آخر کار، پاکستان انتخابی موڈ میں داخل ہو رہا ہے لیکن سیاسی جماعتیں ابھی تک اپنے اپنے پروگراموں کی حمایت میں ووٹروں کو متحرک کرنے سے قاصر ہیں۔ فروری 2024کے عام انتخابات کے لیے قومی اور صوبائی اسمبلی کی نشستوں کے لیے امیدواروں کی جانب سے 28626کاغذات نامزدگی جمع کرائے گئے ہیں جبکہ 2018میں یہ تعداد 21426اور 2013 میں 27991تھی۔ اور کس حد تک ’ غیر موافقت پسند‘ کے طور پر سمجھے جانے والے امیدواروں کو اپنی مہم چلانے کی آزادی ہوگی۔
مہینوں کی غیر یقینی صورتحال کے بعد ای سی پی نے انتخابی شیڈول کا اعلان کیا تاہم، پی ٹی آئی نے جانچ پڑتال کے عمل میں برابری کے میدان کی عدم موجودگی کے ساتھ ساتھ تعصب کی شکایت کی، کیونکہ اس کے امیدواروں کی اکثریت کے کاغذات نامزدگی مسترد کر دئیے گئے۔ اس سے زیادہ تشویشناک بات یہ ہے کہ سیاسی پارٹیوں اور ان کے لیڈروں کی غیر سنجیدہ ذہنیت ہے۔ پاکستان کو معاشی بحران، سیاسی عدم استحکام، بیڈ گورننس، بے روزگاری، مہنگائی، غربت میں اضافے اور تشدد جیسے سنگین مسائل کا سامنا ہے۔ جماعت اسلامی کے علاوہ کوئی بھی سیاسی جماعت پاکستان کے 240ملین عوام کی مشکلات سے نمٹنے کے لیے واضح منشور کے ساتھ سامنے نہیں آئی۔ واضح، وژن، عزم، منصوبہ بندی اور قائدانہ خصوصیات کا فقدان ملک کو درپیش سیاسی بحران کو مزید پیچیدہ بنا دیتا ہے۔سیاست کی اصلاح اور لوگوں کے معیار زندگی کو بہتر بنانے کے لیے طاقت کے استعمال میں ہماری قیادت کی ناقص ذہنیت ایک بڑی خرابی کیوں ہے؟ کیا 8فروری 2024کے انتخابات کو پاکستان کو متوقع معاشی اور سیاسی تباہی سے بچانے کا ’’ آخری موقع‘‘ کہنا چاہیے؟ شفاف انتخابات کو یقینی بنانے کی ذمہ داری ای سی پی اور اس کے صوبائی دفاتر پر عائد ہوتی ہے، اور یہاں تک کہ قبل از انتخابات دھاندلی اور بعض سیاسی جماعتوں کے حق میں یا ان کے خلاف تعصب کا معمولی سا ثبوت بھی انتخابی عمل میں شامل اداروں کی ساکھ کو مجروح کرے گا۔ آنے والے انتخابات پہلے ہی ایک مخصوص سیاسی جماعت کے امیدواروں کے خلاف ہراساں کرنے اور دھمکیاں دینے کے بڑے پیمانے پر الزامات سے دوچار ہیں۔
ایک ہفتہ قبل سپریم کورٹ نے پری پول دھاندلی کا نوٹس لیا تھا اور آزادانہ اور منصفانہ انتخابات کا اہتمام نہ کرنے پر ای سی پی کی سرزنش کی تھی، جو کہ خوف اور جبر سے پاک ماحول بنانے میں انتخابی نگران کی ناکامی کی عکاسی کرتا ہے۔ جب انتخابات کے انعقاد پر کئی ارب روپے خرچ کئے جا رہے ہوں تو ووٹروں کو بلا خوف حق رائے دہی سے محروم کرنا سنگین بحران کو جنم دے گا۔ ایک سیاسی جماعت کی سرپرستی کرنا اور دوسری کو آزادانہ طور پر الیکشن لڑنے کے ماحول سے انکار کرنا نقصان دہ ہوگا۔
موجودہ انتخابی مرحلے میں جو چیز تشویشناک اور ناقابل معافی ہے، وہ خوف کا عنصر ہے، جس نے اس ملک کو طویل عرصے سے اپنی لپیٹ میں لے رکھا ہے۔ جب تمام سیاسی جماعتوں کو انتخابات میں حصہ لینے کے یکساں مواقع فراہم نہیں کئے جائیں گے تو ایسی مشق کی قانونی حیثیت سوالیہ نشان ہوگی۔ جلد ہی بین الاقوامی مبصرین پاکستان پہنچیں گے کہ انتخابی مہم کس حد تک خوف، دھمکی اور تعصب سے پاک ہے اور انتخابات کے دن کس حد تک آزادانہ اور منصفانہ انتخابات ہو سکتے ہیں۔ اگر 2024میں 1971اور 1977کی تاریخ سے گریز کرنا ہے تو آزادانہ اور منصفانہ انتخابات کے انعقاد کے ذمہ دار ریاستی اداروں کو ایسے متعصبانہ اقدامات سے گریز کرنا چاہیے جو ساکھ کو داغدار کرتے ہیں اور عوامی اعتماد کو ٹھیس پہنچاتے ہیں۔
ایک ایسے وقت میں جب ملک دو زاویوں سے انتخابی موڈ میں داخل ہو رہا ہے، ایک ایسے وقت میں مایوپک ذہنیت کے وجود کا تجزیہ کرنے کی ضرورت ہے۔
سب سے پہلے ایسی قیادت کی عدم موجودگی ہے جو پاکستان کے وجود کو خطرے میں ڈالنے والے مسائل سے موثر طریقے سے نمٹنے کے لیے حکمت عملی کے لحاظ سے اہل ہو۔ عام انتخابات کا غیر متنازعہ انعقاد ملک کو معیشت، گورننس اور قانون کی حکمرانی کے سنگین بحرانوں سے نجات دلانے کا ایک معقول موقع فراہم کرے گا۔ اس کے لیے اقربا پروری اور جانبداری کے لیے صفر رواداری کے ساتھ چیزوں کو پیشہ ورانہ ہینڈل کرنے کی ضرورت ہوگی۔ بدقسمتی سے پاکستان کی تاریخ کے 76سال میں نہ تو جمہوریت اور نہ ہی سیاسی تکثیریت اقتدار پر قابض رہنے والوں کی ترجیح رہی۔ ان لوگوں نے اقتدار کا استعمال صرف اپنی مراعات، مراعات اور کمفرٹ زونز کو یقینی بنانے کے لیے کیا، جس کے نتیجے میں غربت، بے روزگاری اور مہنگائی میں اضافہ ہوا۔ جب الیکشن لڑنے والوں کی اکثریت کی ترجیح پاکستان کے 240 ملین عوام کو معاشی دلدل سے نکالنے کے لیے کوئی قابل عمل منصوبہ پیش نہ کرنا ہو تو قوم کا مستقبل ماضی اور حال سے کیسے مختلف ہو سکتا ہے۔ جب اکثریتی سیاسی جماعتیں اور ان کے قائدین صرف اپنی دولت اور تسلط بڑھانے کے لیے صرف اقتدار حاصل کرنے کے لیے انتخابات میں سرمایہ کاری کرنے میں دلچسپی رکھتے ہیں تو اس کا نتیجہ ملک کے لیے تباہ کن ہوگا۔
دوسرا، جب سیاسی مخالفین کو ان کے جمہوری حقوق سے محروم کیا جاتا ہے اور ریاستی حکام غیر قانونی حراست اور ان کی انتخابی مہم شروع کرنے سے انکار کے ذریعے مجبور کرتے ہیں، تو یہ لوگوں میں غصے اور دشمنی کو جنم دینے کا پابند ہے۔ مثال کے طور پر 27دسمبر کو اڈیالہ جیل راولپنڈی میں پنجاب پولیس کی جانب سے دو مرتبہ کے وزیر خارجہ کے ساتھ جس طرح بدتمیزی کی گئی وہ ملک میں قانون کی حکمرانی کی سراسر عدم موجودگی کو ظاہر کرتا ہے۔ اس خاص واقعے نے پوری دنیا میں پاکستان کی بدنامی کی اور آزادانہ اور منصفانہ انتخابات کے انعقاد کے عہد کے بارے میں سنگین شکوک و شبہات کو جنم دیا۔ جمہوریت اور انتخابی عمل کو پہنچنے والے نقصان کے بین الاقوامی سطح پر پاکستان کی ساکھ پر منفی اثرات مرتب ہوں گے۔
مایوپک ذہنیت بھی عدلیہ کی انصاف فراہم کرنے اور اپنے فیصلوں پر عمل درآمد میں ناکامی کی عکاسی کرتی ہے، اس طرح ان عناصر کو جگہ فراہم کرتی ہے جو قانون کی حکمرانی کو نقصان پہنچاتے ہیں۔ مزید برآں، سول سوسائٹی اور انسانی حقوق کے گروپوں کی جانب سے آئین اور قانون کی حکمرانی کی خلاف ورزی کی شدید مخالفت کرنے میں ناکامی مائیوپیک ذہنیت کی گہرائی کو ظاہر کرتی ہی۔ جب تک پاکستان ایک نارمل ریاست نہیں بن جاتا جہاں بہترین قائدانہ صلاحیتوں کے ساتھ گڈ گورننس پر فوکس کیا جاتا ہے، کوئی بھی یہ توقع نہیں کر سکتا کہ وہ ناقص ذہنیت کی لعنت ختم ہو جائے گی۔
( ڈاکٹر پروفیسر مونس احمر ایک مصنف، بین الاقوامی تعلقات کے ممتاز پروفیسر اور سابق ڈین فیکلٹی آف سوشل سائنسز، جامعہ کراچی ہیں۔ ان سے amoonis@hotmail.comپر رابطہ کیا جا سکتا ہے۔ اُن کے انگریزی آرٹیکل کا ترجمہ بین الاقوامی یونیورسٹی جاپان کے ڈاکٹر ملک اللہ یار خان نے کیا ہے)۔
