ایشیا کپ سپر 4 مرحلے میں پاکستان ٹیم آج افغانستان سے ٹکرائے گی، فتح گرین شرٹس کو فائنل میں پہنچا دے گی۔
تفصیلات کے مطابق ایشیا کپ 2022 کے سپر فور مرحلے میں افغانستان کو ہرا کر پاکستان فائنل میں پہنچنے کے لیے پوری تیاری کر چکا ہے۔
افغان ٹیم کے لیے یہ مقابلہ ڈو اور ڈائی کا ہے، میچ پاکستانی وقت کے مطابق شام 7 بجے شارجہ میں کھیلا جائے گا۔ پاکستان کی جیت کی صورت میں سری لنکا کو بھی فائنل کا ٹکٹ مل جائے گا، جب کہ بھارت اور افغانستان کا سفر تمام ہو جائے گا۔
بھارت سے جیتنے کے بعد ٹیم پر اعتماد ہو گئی ہے، شاہین شاہ آفریدی کی بولنگ اور بابر اعظم کے رنز کے بغیر بھی شاہین اُڑ رہے ہیں، جب کہ رضوان فٹنس سے لڑتے ہوئے بھی جیت کے دروازے کھول رہے ہیں۔ بابر اعظم کا کہنا ہے کہ رضوان جیسا کھلاڑی نہیں دیکھا۔
ادھر افغانستان پاکستان کا روایتی حریف بنتا جا رہا ہے، 2021 ورلڈ کپ میں آصف علی نے پاکستان کو چھکے لگا کر پھنسا ہوا میچ جتوایا تھا، اب شارجہ میں افغانی اسپنرز مشکل میں ڈال سکتے ہیں۔
افغانستان کے خلاف پاکستان کو ہانگ کانگ جیسا کھیل دکھانا ہوگا، افغان بولر راشد اور مجیب کو وکٹیں دے دیں تو پاک ٹیم مشکل میں پڑ سکتی ہے۔
پاکستان نے افغانستان کے خلاف دونوں ٹی 20 انٹرنیشنلز چیز کر کے جیتے، پہلا 2013 اور پھر 2021 میں، افغانستان کے لیے میچ ڈو اور ڈائی ہوگا، اور شارجہ اسٹیڈیم کے اسٹینڈز میں بھی تماشائیوں کا میچ پڑے گا۔
ادھر شاہین شاہ آفریدی نے بھی لندن سے قومی بولرز کو پیغام دیا ہے، انھوں نے افغانستان کے خلاف حارث رؤف اور نسیم شاہ کو اچھی بولنگ کے گُر بتائے۔
