سعودی عرب میں اسکول کے ایک طالبعلم کو طویل غیر حاضری پر نوٹس جاری کیا گیا جس پر اس کے والد کے جواب نے لوگوں کو رُلا دیا۔
سعودی عرب کے عسیر ریجن میں گزشتہ ماہ 18 رمضان المبارک کو ٹریفک حادثے میں 17 سالہ طالب علم محمد عبدالرحمان زندگی کی بازی ہار گیا تھا۔ تاہم اس کی حادثاتی موت سے لاعلم اسکول انتظامیہ نے طالبعلم کی طویل غیر حاضری پر اس کے والد کو نوٹس بھیجا جس کا جواب سوشل میڈیا پر وائرل ہوگیا جس نے سب کو رُلا دیا۔
سبق نیوز کے مطابق عیسر ریجن کی کمشنری قنا میں اسکول انتظامیہ کی جانب سے طالب علم محمد عبدالرحمان کی طویل غیر حاضری پر اس کے والد کو موبائل پر پیغام موصول ہوا جس میں طالب علم کے غیر حاضر رہنے کی اطلاع دیتے ہوئے اس کی وضاحت طلب کی گئی تھی۔
رپورٹ کے مطابق مرحوم طالب علم کے والد نے نوٹس کے جواب میں اسکول انتظامیہ کو مخاطب کرتے ہوئے دردناک الفاظوں میں لکھا کہ میں طالبعلم محمد عبدالرحما کا والد یہ اطلاع دے رہا ہوں کہ آپ کا طالب علم اور میرا بیٹا اب اس دنیا سے ہی غیر حاضر ہو گیا ہے۔
والد نے مزید لکھا کہ میری خواہش تھی اپنے سابقہ معمول کی طرح بیٹے کو نیند سے بیدار کروں اور اسکول جانے کے لیے زور دوں لیکن وہ اب اس فانی دنیا سے دور جنت الفردوس میں جا چکا ہے۔
غمزدہ والد نے یہ بھی لکھا کہ میرا خیال ہے کہ آپ کی جانب سے یہ پیغام غلطی سے آیا ہے تاہم میں اس کا جواب اس امید پر دے رہا ہوں کہ آپ میرے بیٹے کے اساتذہ، اسکول اور کلاس کے ساتھیوں کو سلام کہہ دیں اور اسے ہمیشہ اپنی دعاؤں میں یاد رکھیں۔
یہ جذباتی دکھ بھرا پیغام مقامی سوشل میڈیا پر بھی وائرل ہو گیا جس نے لوگوں کو رلا دیا اور صارفین کی بڑی تعداد اس پر غمزدہ والد سے تعزیت اور صبر کی تلقین کر رہی ہے۔
