’سپریم کورٹ کے فیصلے کے بعد اب حکومت کو آئینی ترمیم میں مشکلات کا سامنا ہو گا‘

پارلیمانی سیاست کے ماہر اور پلڈاٹ کے سربراہ احمد بلال محبوب نے کہا ہے کہ مخصوص نشستوں کے حوالے سے سپریم کورٹ کے اس فیصلے کے ساتھ اب حکومت کو آئینی ترامیم میں مشکلات کا سامنا کرنا پڑ سکتا ہے۔

انھوں نے بی بی سی کے نامہ نگار شہزاد ملک کو بتایا کہ بظاہر مسلم لیگ ن اور دیگر اتحادی جماعتوں کی حکومت کے پاس قومی اسمبلی میں دو تہائی اکثریت معطل ہو گئی ہے۔

وہ کہتے ہیں کہ ججز اور چیف جسٹس کی تقرری کے حوالے سے قانون سازی زیر غور تھی مگر اب ان امیدوں پر پانی پھر گیا ہے کیونکہ اس کے لیے آئینی ترمیم درکار ہوگی۔

تاہم احمد بلال محبوب مزید کہتے ہیں کہ روٹین کی قانون سازی جس میں دو تہائی اکثریت کی ضرورت نہیں، اس میں حکومت کو کوئی رکاوٹ درپیش نہیں۔