فہد مصطفیٰ پر رجب بٹ کے خلاف سازش کا سنسنی خیز الزام: کاشف ضمیر کا انکشاف

سوشل میڈیا کی دنیا ایک بار پھر ایک نئے تنازع کا شکار ہو گئی ہے۔ خبر کے مطابق متنازع شہرت رکھنے والے ٹک ٹاکر کاشف ضمیر نے معروف اداکار فہد مصطفیٰ پر سنسنی خیز الزام عائد کر دیا۔ نجی ٹی وی کے ایک پروگرام میں گفتگو کرتے ہوئے کاشف ضمیر نے دعویٰ کیا کہ رجب بٹ کے خلاف ہونے والے قانونی مقدمات کے پیچھے فہد مصطفیٰ کا ہاتھ ہے۔

کاشف ضمیر کے مطابق، انہیں یہ اطلاع ایک ایسے شخص نے دی جو فہد مصطفیٰ کو ذاتی طور پر جانتا ہے۔ ان کے بقول، اس شخص نے انہیں کچھ ثبوت بھی دکھائے جن سے یہ تاثر ملا کہ رجب بٹ کی ساکھ کو متاثر کرنے کے پیچھے فہد مصطفیٰ شامل ہو سکتے ہیں۔ تاہم، کاشف ضمیر نے وہ شواہد ٹی وی پروگرام میں پیش کرنے سے انکار کر دیا، جس پر سوشل میڈیا صارفین نے شدید ردِعمل ظاہر کیا اور شواہد منظر عام پر لانے کا مطالبہ کیا۔

کاشف ضمیر نے یہ بھی کہا کہ رجب بٹ ایک ابھرتا ہوا بڑا نام ہے، جس کی شہرت سے بعض لوگ حسد کا شکار ہیں۔ ان کے مطابق رجب بٹ کی پرانی ویڈیوز کو جان بوجھ کر وائرل کیا جا رہا ہے تاکہ ان کی ساکھ کو نقصان پہنچایا جا سکے۔ کاشف نے رجب کو مشورہ دیا کہ وہ اپنی ویڈیوز میں محتاط رویہ اختیار کریں کیونکہ ان کے بیانات کو سیاق و سباق سے ہٹا کر پیش کیا جا رہا ہے۔

یہ انکشاف سوشل میڈیا پر تیزی سے وائرل ہو رہا ہے، اور صارفین اس دعوے پر حیران ہیں۔ بعض افراد کا کہنا ہے کہ اگر واقعی فہد مصطفیٰ اس معاملے میں ملوث ہیں تو یہ ایک بڑا اسکینڈل بن سکتا ہے، جبکہ دیگر افراد کا مؤقف ہے کہ بغیر ثبوت کے ایسے الزامات محض سنسنی پھیلانے کا حربہ ہیں۔

اداکار فہد مصطفیٰ کی جانب سے تاحال اس الزام پر کوئی ردعمل سامنے نہیں آیا۔