انڈیا کے وزیرِ دفاع راج ناتھ سنگھ کا کہنا ہے کہ انھیں یقین ہے کہ ایک دن پاکستان کے زیرِ انتظام کشمیر خود لوٹ کر انڈیا کے پاس آئے گا۔
جمعرات کے روز دہلی میں ایک تقریب سے خطاب کرتے ہوئے، راج ناتھ سنگھ نے دعویٰ کیا کہ پاکستان کے زیرِ انتظام کشمیر کے لوگوں کی ایک بڑی تعداد انڈیا کے ساتھ تعلق محسوس کرتی ہے۔
’کچھ گنے چنے ہی ہیں جنھیں بھٹکایا گیا ہے۔‘
راج ناتھ سنگھ نے پاکستان کے زیرِ انتظام کشمیر کے رہائشیوں کو بھائی پکارتے ہوئے کہا، ’ہمارے بھائیوں کی حالت کچھ ایسی ہی ہے جیسی مہارانا پرتاپ سنگھ کے چھوٹے بھائی شکتی سنگھ کی تھی۔ چھوٹے بھائی کے الگ ہو جانے کے باوجود مہارانا پرتاپ کا اپنے چھوٹے بھائی پر بھروسہ قائم رہا اور وہ کہتے تھے کہ میرا ہی بھائی ہے مجھ سے دور کہاں جائے گا۔‘
انھوں نے دعویٰ کیا کہ انڈیا ہمیشہ دلوں کو جوڑنے کی بات کرتا ہے۔
راج ناتھ سنگھ کا کہنا تھا کہ انھیں یقین ہے کہ ’وہ دن دور نہیں جب محبت، اتحاد اور سچائی کے راستے پر چلتے ہوئے ہمارا اپنا حصہ پاکستان کے زیرِ انتظام کشمیر لوٹ کر کہے گا کہ میں بھارت ہی ہوں۔۔۔ اور واپس آیا ہوں۔‘
ان کا مزید کہنا تھا کہ پاکستان کے زیرِ انتظام کشمیر کے انڈیا کے ساتھ انضمام کا انحصار انڈیا کی ثقافتی، سماجی اور اقتصادی خوشحالی پر ہے۔‘
