جدید جنگوں کا میدان اب صرف سرحدوں یا فضاؤں تک محدود نہیں رہا۔ آج کی جنگیں خاموش، پیچیدہ اور ٹیکنالوجی پر مبنی ہوتی جا رہی ہیں۔ سائبر اسپیس اور ڈیجیٹل محاذ اب کسی بھی قوم کے دفاعی نظام کا اہم حصہ بن چکے ہیں۔ ایسے میں غیرروایتی ہیروز ابھر رہے ہیں—ایسے کردار، جو محاذ پر نہیں بلکہ کوڈز، سرورز اور نیٹ ورکس کے ذریعے جنگ لڑتے ہیں۔
معروف کالم نگار جاوید چوہدری نے اپنے تازہ ترین کالم میں انکشاف کیا ہے کہ پاکستان فضائیہ کے خفیہ اور دفاعی آپریشن "بنیان المرصوص” میں بھارت کی طرف سے کی گئی میزائل جارحیت کو ناکام بنانے میں ایک پاکستانی ہندو نوجوان نے اہم ترین کردار ادا کیا۔
کالم کے مطابق، 9 اور 10 مئی کی شب بھارت نے پاکستان پر اپنے جدید براہموس میزائلوں سے حملہ کیا۔ پہلا ہدف راولپنڈی کا نور خان ایئربیس تھا، جو جی ایچ کیو کے بالکل قریب واقع ہے۔ تاہم، پاک فضائیہ کے تیار کردہ "ویژن لنک” سسٹم اور اینٹی میزائل دفاعی نظام نے ان میزائلوں کو فضا میں تباہ کر دیا۔
جاوید چوہدری لکھتے ہیں کہ اس سے قبل ہی پاک فضائیہ کے سائبر وار یونٹ نے بھارت کے پورے دفاعی نظام کو ہیک کر رکھا تھا۔ اس ہیکنگ یونٹ کی نگرانی ایک پاکستانی ہندو نوجوان کمپیوٹر ماہر کر رہا تھا، جس نے نہ صرف بھارتی ریڈار اور کمیونی کیشن سسٹمز کو ہیک کیا بلکہ براہموس میزائلوں کا رخ موڑ کر انھیں بھارت ہی کے شہروں پر گرا دیا۔
اس انٹیلیجنس اور سائبر کارروائی کا مقصد بھارت کو خاموش اور بھرپور پیغام دینا تھا، کہ پاکستان اب صرف روایتی جنگوں پر نہیں بلکہ ملٹی ڈومین آپریشنز میں بھی مکمل مہارت حاصل کر چکا ہے۔
چوہدری کے بقول، ان حملوں کے بعد سوشل میڈیا پر بھارت کے مختلف شہروں سے دھماکوں اور آگ لگنے کی اطلاعات گردش کرنے لگیں، جو درحقیقت پاکستان کی طرف سے کی گئی دفاعی ہیکنگ کا نتیجہ تھیں۔ اس پوری کارروائی کو "بنیان المرصوص” کا نام دیا گیا — ایک ایسا آپریشن جس نے بھارت کی جدید عسکری صلاحیتوں کو بے نقاب کر دیا۔
تاحال اس ہیکنگ آپریشن اور "بنیان المرصوص” کے حوالے سے کسی بھی پاکستانی یا بھارتی سرکاری ادارے کی جانب سے کوئی باضابطہ تصدیق یا تردید سامنے نہیں آئی ہے۔
