پاکستانیوں کو مارا جارہا ہے، کوئی محفوظ نہیں، کرغزستان میں پھنسے پاکستانی طالبعلم کا بیان

کرغزستان میں پھنسے پاکستانی طالبعلم نے انکشاف کیا ہے کہ پاکستانیوں کو مارا جارہا ہے ، کوئی محفوظ نہیں۔

تفصیلات کے مطابق کرغزستان میں پھنسے پاکستانی طالبعلم نے ایک نجی ٹی وی چینل سے گفتگو کرتے ہوئے بتایا کہ جان سے مارنے کیلئے بار بار ہاسٹل پر حملے کیےجا رہے ہیں ، طلبا ہوسٹل میں قید ہوکر رہ گئے اور طالبات کو ہراساں کیا جارہا ہے۔

پاکستانی طالبعلم کا کہنا تھا کہ پاکستانیوں کو مارا جارہا ہے ، لڑکیوں کو ہراساں کیا جارہا ہے ،کوئی محفوظ نہیں۔

طالبعلم  نے کہا کہ کرغز سمجھتے ہیں کہ جھگڑا کرنے والے پاکستانی ہے، پاکستانی سفارتخانہ مدد نہیں کر رہا، حکومت مددکرے۔

کرغز صورتحال پر مردان کے طالبعلم طلحہٰ احمد نے مدد کی اپیل کرتے ہوئے کہا کہ طلبا ہاسٹلز اور گھروں میں محصور ہیں، سفارت خانہ مددنہیں کر رہا، حکومت پاکستان حفاظت یقینی بنائیں۔

طلحہٰ احمد کا کہنا تھا کہ حکومت بحفاظت واپسی کیلئے اقدامات کریں، یونیورسٹی میں اب تک صورتحال کشیدہ ہے۔

اس سے قبل بھی پھسنے پاکستانی طالب علم رضوان نے بتایا تھا کہ ابھی تک سفارت خانے کے حکام  نے رابطہ نہیں کیا، 500کے قریب حملہ آوروں  نے ہاسٹلز میں توڑ پھوڑ کی، بلوائیوں  نے طالبات کو بھی تشدد کا نشانہ بنایا۔

طالب علم کا کہنا تھا کہ مقامی لوگوں  نے پاکستانی، بنگلہ دیشی اور دیگر غیر ملکی طلبہ پر حملہ کیا، ایک ہزار سے زائد طلبہ ہاسٹل میں محصور ہیں۔