سینیٹ آف پاکستان کے قیام کی گولڈن جوبلی کے موقع پر اسٹیٹ بینک نے 50 روپے کا یادگاری سکہ جاری کرنے کا فیصلہ کیا ہے۔
تفصیلات کے مطابق سینیٹ آف پاکستان ک کی گولڈن جوبلی کے موقع پر اسٹیٹ بینک 50 روپے کا یادگاری سکہ جاری کرے گا۔
سال 2023 پاکستان کے سینیٹ کی گولڈن جوبلی کا سال ہے، اس خصوصی موقع کی مناسبت سے وفاقی حکومت نے اسٹیٹ بینک آف پاکستان کو 50 روپے کا یادگاری سکہ جاری کرنے کی اجازت دی ہے۔
یہ یادگاری سکہ 17 مارچ 2023 سے ایس بی پی بینکنگ سروسز کارپوریشن کے فیلڈ دفاتر کے تمام تبادلہ کاؤنٹرز سے جاری کیا جائے گا۔
سکے کا وزن 13.5 گرام ہے اور یہ تانبے اور نکل کے دھاتی اجزا پر مشتمل ہے۔
سکے کے سامنے کے رخ کے درمیان میں بڑھتا ہوا ہلالی چاند اور 5 نوکوں پر مشتمل ستارہ نقش ہے۔
سکے کے دائرے کے ساتھ چاند ستارے کے اوپر اسلامی جمہوریہ پاکستان کے الفاظ اردو اسکرپٹ میں کندہ کیے گئے ہیں، چاند کے نیچے اور گندم کی اوپر کو اٹھتی ہوئی 2 شاخوں کے اوپر سکے کے اجرا کا سال 2023 تحریر ہے۔
سکے کی ظاہری مالیت 50 ابھرے ہوئے اعداد میں اور روپیہ اردو اسکرپٹ میں بالترتیب چاند ستارے کے دائیں اور بائیں جانب تحریر کیے گئے ہیں۔
سکے کی پچھلی طرف اور سکے کے مرکز میں پاکستان کی سینیٹ کے امتیازی نشان کو 50 کے فنکارانہ عددی الفاظ کے ساتھ نقش کیا گیا ہے جو اس کے دائیں جانب ہے۔
اس امتیازی نشان کے اوپر دائرے کے ساتھ اردو اسکرپٹ میں پاکستان سینیٹ گولڈن جوبلی کے الفاظ کندہ ہیں، سینیٹ کے امتیازی نشان کے نیچے گولڈن جوبلی کی مدت 1973- 2023 درج ہے
