دنیا کے کس ملک میں آئل اور گیس کے کتنے ذخائر ؟

یوکرین پر حملے کے بعد امریکا نے روسی آئل، گیس اور کوئلے کی درآمدات پر پابندی لگا دی جبکہ برطانیہ اور دیگر یورپین ممالک نے بھی روس سے نکلنے والے تیل اور گیس کے بائیکاٹ کا فیصلہ کیا ہے۔

برطانیہ کی طرف سے کہا گیا ہے کہ وہ اس سال کے آخر تک روسی تیل پر انحصار کم کر دیگا، جس کیلئے اس کے متبادل کی تلاش جاری ہے۔

دنیا کے کس ملک میں آئل اور گیس کے کتنے ذخائر موجود ہیں؟

غیر ملکی میڈیا کے مطابق برطانوی آئل جائنٹ ’بی پی‘ کے مطابق روس میں 107.8 ہزار ملین بیرل تیل اور 37.4 کھرب کیوبک میٹر گیس کے ذخائر موجود ہیں۔

رپورٹ میں بتایا گیا ہے کہ دنیا میں سب سے زیادہ تیل وینزویلا میں موجود ہے، جہاں ایک اندازے کے مطابق اس وقت 303.8 ہزار ملین بیرل تیل کے ذخائر ہیں جبکہ سعودی عرب میں 297.5 ہزار ملین بیرل تیل موجود ہے۔

غیر ملی میڈیا رپورٹس کے مطابق کینیڈا میں 168.1، ایران میں 157.8، کویت میں 101.5، متحدہ عرب امارات میں 97.8، امریکا میں 68.8، عراق میں 145 اور لیبیا میں 48.4 ہزار ملین بیرل تیل کے ذخائر موجود ہیں۔

رپورٹ میں بتایا گیا ہے کہ دنیا کے دوسرے حصوں میں 235.7 ہزار ملین بیرل تیل کے ذخائر موجود ہیں۔

گیس کے ذخائر

برٹش پیٹرولیم (بی پی) کے مطابق روس میں اس وقت 37.4 کھرب کیوبک میٹر گیس جبکہ ایران میں 32.1 کھرب کیوبک میٹر گیس کے ذخائر موجود ہیں۔

رپورٹ میں بتایا گیا ہے کہ قطر میں 24.7، وینزویلا میں 6.3، سعودی عرب میں 6، متحدہ عرب امارات میں 5.9، نائیجیریا میں 5.5، ترکمانستان میں 13.6، امریکا میں 12.6 اور چین میں 8.4 کھرب کیوبک میٹرز گیس کے ذخائر موجود ہیں۔

بی پی کے مطابق دنیا کے دیگر حصوں میں 35.7 کھرب کیوبک میٹرز گیس کے ذخائر موجود ہیں۔