صوبہ خیبر پختونخوا میں ہنگامی صورتحال سے نمٹنے والے صوبائی ادارے پی ڈی ایم اے نے دریائے سوات میں خوازہ خیلہ کے مقام پر پانی کی سطح 77,782 کیوسک تک پہنچنے کے بعد دریائے سوات میں انتہائی درجے کے سیلاب کا الرٹ جاری کر دیا ہے۔
شدید بارشوں کے باعث پیدا ہونے والی اس خطرناک صورتحال کے پیش نظر پشاور، چارسدہ اور نوشہرہ کے اضلاع کو ہائی الرٹ کر دیا گیا ہے۔
پی ڈی ایم اے کی جانب سے ضلعی انتظامیہ اور متعلقہ اداروں کو جاری کردہ مراسلے میں انسانی جانوں، املاک، فصلوں اور مویشیوں کے تحفظ کے لیے فوری احتیاطی اقدامات کی ہدایت دی گئی ہے۔
پی ڈی ایم اے صوبہ خیبر پختونخوا کی جانب سے تمام اضلاع کو سیلاب سے متاثر ہونے والے ممکنہ علاقوں اور کمزور مقامات کی فوری نشاندہی کر کے وہاں حفاظتی اقدامات یقینی بنانے کے احکامات جاری کیے گئے ہیں۔
ریسکیو 1122، سول ڈیفنس اور دیگر ہنگامی اداروں کو نشیبی اور حساس علاقوں میں ہائی الرٹ رہنے کی ہدایات دی گئی ہیں جبکہ دریائے کابل اور اس کے معاون دریاؤں کے کنارے آباد آبادیوں کو ممکنہ خطرات سے بروقت آگاہ کیا جا رہا ہے۔
اسی کے ساتھ ساتھ ضلعی انتظامیہ کو ہدایت کی گئی ہے کہ وہ متاثرہ علاقوں کی آبادی کو محفوظ مقامات پر منتقل کریں اور ریلیف کیمپوں میں خوراک، ادویات اور رہائش کی سہولیات فوری طور پر مہیا کی جائیں۔
پی ڈی ایم اے نے متعلقہ محکموں کو ہدایت کی ہے کہ ممکنہ سڑک بندش یا پانی جمع ہونے کی صورت میں مشینری اور دیگر ضروری آلات اہم مقامات پر پہلے سے پہنچائے جائیں تاکہ سیلابی صورتحال کی وجہ سے بند ہو جانے والی اہم شاہراہوں کو کھولنے کے لیے اقدامات کیے جا سکیں۔
پی ڈی ایم اے کا صوبائی ایمرجنسی آپریشن سینٹر 24 گھنٹے فعال ہے اور شہری کسی بھی ہنگامی صورتحال یا معلومات کے لیے ہیلپ لائن 1700 پر رابطہ کر سکتے ہیں۔
