بجلی کمپنیوں نے وزیر اعظم کی وارننگ ہوا میں اڑا دی، لوڈ شیڈنگ 18 گھنٹے ہو گئی، شدیدگرمی میں غیر اعلانیہ لوڈ شیڈنگ جاری ہے۔
تفصیلات کے مطابق ملک بھر میں بجلی کی کئی کئی گھنٹے لوڈ شیڈنگ جاری ہے، شدیدگرمی میں عوام کا جینا محال ہو چکا ہے، کراچی میں 9 گھنٹے کی لوڈ شیڈنگ کا دورانیہ بڑھا کر 18 گھنٹے تک کر دیا گیا ہے۔
شہروں میں 6 سے 8 جب کہ دیہات میں 10 سے 12 گھنٹے بجلی غائب ہوتی ہے، کے الیکٹرک نے بھی لوڈ شیڈنگ کا دورانیہ بڑھا کر 15 گھنٹے کر دیا، بعض علاقوں میں دورانیہ اٹھارہ گھنٹے تک بڑھا دیا گیا ہے۔
ذرائع این ٹی ڈی سی کےمطابق ملک میں بجلی کی پیداوار 21 ہزار میگا واٹ کے لگ بھگ ہے، بجلی کی طلب 27 ہزار 5 سو میگا واٹ ہے جب کہ شارٹ فال 6500 میگا واٹ ہے۔
کراچی میں 40 فی صد سے زائد حصے میں بجلی بند ہے، مختلف علاقے اندھیرے میں ڈوبے ہوئے ہیں، لوڈ شیڈنگ سے مستثنیٰ علاقوں میں بھی دن میں 3 سے 5 بار ایک گھنٹے کے لیے بجلی بند کر دی جاتی ہے، جب کہ لوڈ شیڈنگ والے علاقوں میں ہر گھنٹے بعد 2 گھنٹے کی لوڈ شیڈنگ ہو رہی ہے۔
شدید حبس اور گرمی میں غیر اعلانیہ لوڈ شیڈنگ نے شہریوں کو عذاب میں مبتلا کر دیا ہے، جس پر بجلی کی طویل لوڈ شیڈنگ کے خلاف مختلف شہروں میں عوام سڑکوں پر نکل آئے۔
عاجز آئے شہریوں نے وفاقی حکومت کے خلاف نعرے لگائے، ان کا کہنا تھا کہ شہباز شریف سے حکومت نہیں سنبھل رہی تو گھر چلے جائیں، گھنٹوں کی لوڈ شیڈنگ سے عوام کا معاشی قتل کیا جا رہا ہے، کاروبار ٹھپ ہو گئے ہیں۔
