سعودی عرب جس کے بارے میں یہ کہا جاتا تھا کہ وہ آئل کی پیداوار کے باعث خود کفیل ہے تاہم اب اس نے اس تاثر کو زائل کردیا ہے۔
جی ہاں سعودی عرب کے نان آئل سیکٹر کی ترقی رفتار پکڑنے لگی ہے، جس کی تصدیق ایک کاروباری سروے نے کی ہے۔
سروے کے مطابق سعودی عرب کے نان آئل سیکٹر نے مئی میں خاطر خواہ رفتار حاصل کی ہے، ریاض بینک سعودی عرب پرچیزنگ منیجرز انڈیکس کی تازہ ترین رپورٹ کے مطابق مملکت کا پی ایم آئی مئی میں 58.5 پر تھا جو کہ اقتصادی ترقی کی نشاندہی کرتا ہے۔
ریاض بینک کے چیف اکنامسٹ نایف الغیث نے بتایا کہ معمولی کمی کے باوجود حالیہ اعداد و شمار اس خیال کو تقویت دیتے ہیں کہ سعودی عرب میں مجموعی اقتصادی سرگرمیاں بہترین انداز میں جاری ہیں۔
رپورٹ کے مطابق مملکت میں غیر تیل کے نجی شعبے کے کاروبار میں نئے آرڈر کی آمد میں مئی میں نمایاں طور پر اضافہ ہوا جب اپریل میں ترقی صرف ساڑھے آٹھ سالوں میں اپنی بلند ترین سطح پر پہنچی تھی۔
رپورٹ کے مطابق نئے آرڈرز میں اضافے نے سعودی عرب میں سیاحت اور تعمیراتی شعبوں پر مثبت اثر ڈالا جس کے نتیجے میں مئی میں ملازمتوں کے مواقع میں اضافہ ہوا۔
ریاض بینک کے چیف اکنامسٹ نے کہا کہ ملک میں گیگا پراجیکٹس کی ترقی جس کا مقصد معیشت کو متنوع بنانا ہے، اس سال کے بقیہ مہینوں میں نجی شعبے کی ترقی کو جاری رکھے گا۔
نایف الغیث نے کہا کہ ’حکومت بڑے پیمانے پر تنوع کی پالیسیوں پر عمل درآمد جاری رکھے ہوئے ہے، گیگا پراجیکٹس کی ترقی کا مقصد نجی شعبے کو فروغ دے کر ملازمتیں پیدا کرنا ہے۔
ہمیں یقین ہے کہ غیر تیل کا شعبہ اس سال ترقی کو آگے بڑھانے میں اہم کردار ادا کرے گا
