ایران نے خبردار کیا ہےکہ اسرائیل نے غزہ پر حملے بند نہ کیے تو جنگ میں نیا محاذ کھل سکتا ہے۔
ایرانی وزیر خارجہ حسین امیر عبدالہیان لبنان کے دارالحکومت بیروت پہنچے جہاں لبنانی حکام کے ساتھ ساتھ حماس اور اسلامی جہاد کے نمائندوں نے ان کا استقبال کیا۔
اس موقع پر صحافیوں سے گفتگو میں ایرانی وزیر خارجہ نے حزب اللہ کی طرف ممکنہ اشارہ کرتے ہوئے کہا کہ غزہ کی ناکہ بندی اور اسرائیلی جنگی جرائم کے نتیجے میں نیا محاذ کھلنا ممکنہ حقیقت ہے۔
دوسری جانب ایران کے ساتھ منسلک طاقتور عراقی اور یمنی مسلح گروہوں نے دھمکی دی ہے کہ اگر واشنگٹن نے غزہ میں حماس کے ساتھ اس کے تنازعہ میں اسرائیل کی حمایت کرنے کے لیے مداخلت کی تو وہ امریکی مفادات کو میزائلوں اور ڈرونز سے نشانہ بنائیں گے جو پہلے ہی مزید محاذوں پر پھیلنے کے آثار دکھاتے ہیں۔
یہ بیانات اسرائیل کے حملوں کے ردعمل کے لیے امریکہ کی طرف سے بھرپور حمایت اور اسرائیل کو تیزی سے اضافی جنگی سازوسامان فراہم کرنے اور مشرقی بحیرہ روم میں ایک کیریئر اسٹرائیک گروپ کو تعینات کرنے کے امریکی وعدے کے درمیان سامنے آئے ہیں۔
