ملک کے مختلف شہروں میں خارش کی شکایات عام ہیں، اس بیماری کی کیا وجوہات و علامات ہیں اور اس کے بچاؤ کیلئے کیا اقدامات ضروری ہیں۔
ہر سال موسم کی تبدیلی کے باعث جلد کی خشکی عام مسئلہ بن جاتی ہے جو بعض اوقات شدید بھی ہوسکتی ہے، یہ خارش اور الرجی کا سبب بھی بنتی ہے جس کے شکار بچے بہت جلدی ہوجاتے ہیں۔
اکثر دھول مٹی جلد کی خشکی یا پھر کمبل وغیرہ سے الرجی کے باعث بھی خارش کا مسئلہ ہوتا ہے، خارش کو جِلد کی الرجی کی ایک قسم سمجھا جاتا ہے، اس کی وجہ سے شدید بے چینی کا سامنا کرنا پڑ سکتا ہے۔
یہ بات ہم سب کے مشاہدے میں آتی ہے کہ اگر جِلد پر ایک دفعہ خارش شروع ہو جائے تو کافی دیر بعد جاکر اس میں کمی آنا شروع ہوتی ہے اور انسان کے پاس کھجانے کے سوا کوئی آپشن نہیں ہوتا لیکن مسئلہ یہ ہے کہ جِلد کھجانے کی وجہ سے وقتی سکون تو مل جاتا ہے لیکن یہ اسی شدت کے ساتھ دوبارہ نمودار ہو جاتی ہے۔
خارش کی علامات میں سکن کی لالی، گرمی، سوجن، درد، اور خارش شامل ہیں۔ خارش، چھتے، تختیاں، یا چھالے بھی ساتھ ہو سکتے ہیں۔ جلد کی سوزش کی وجہ شدید ہو سکتی ہے، جیسے کہ الرجی یا بیکٹیریل، وائرل، یا فنگل انفیکشن، یا جیسے کہ آٹوامیون شامل ہیں۔
اس کے تدارک کیلئے کچھ گھریلو ٹوٹکوں سے آپ اس مسئلے سے چھٹکارا پاسکتے ہیں۔
ناریل کا تیل
ماہرین کے مطابق ناریل کا تیل خارش سے نجات دلانے میں اہم کردار ادا کرتا ہے، کیونکہ ناریل میں اینٹی بیکٹریل اور اینٹی الرجک خصوصیات موجود ہوتی ہیں۔
خارش کی صورت میں متاثرہ جگہ یا پھر پورے جسم پر ناریل کے تیل کی مالش کریں۔
پیٹرولیم جیلی
اگر آپ اپنی جلد کو چکنا رکھنا چاہتے ہیں تو اس کے لیے معیاری پیٹرولیم جیلی سے بہتر کچھ نہیں ہے، جب خارش ہو یا جلد خشک ہو تو پیٹرولیم جیلی لگائیں اس سے آرام آئے گا۔
امرت دھارا
امرت دھارا ایک طرح کی جڑی بوٹی ہے، سردیوں میں اگر کسی بھی چیز سے الرجی ہو جائے اور بے تحاشہ خارش ہو تو فوری ناریل کے تیل میں امرت دھارا ملائیں اور اسے اچھی طرح مکس کر کے خارش والے متاثرہ حصے پر لگائیں۔
اس سے فوری طور پر خارش دور ہو گی اور الرجی بھی ختم ہو جائے گی۔
نیم کے پتے
نیم میں قدرت نے بے شمار فوائد رکھے ہیں، اس کی اہم خصوصیات میں ایک یہ بھی ہے کہ اسے خارش اور الرجی سے نجات کے لیے بھی استعمال کیا جا سکتا ہے۔
نیم کو پتوں کو گرم پانی میں پکا کر اس پانی سے نہا لیں تو جسم سے تمام جراثیم اور خارش ختم ہو جائے گی
