چیئرمین پاکستان تحریک انصاف عمران خان کی سربراہی میں پارٹی کے مرکزی قائدین کے اجلاس کے دوران نیب اور رینجرز کے خلاف مقدمے کے اندراج کا فیصلہ کیا گیا ہے۔
لاہور میں عمران خان کی رہائش گاہ زمان پارک میں اتوار کی شام ہونے والے اس اجلاس میں ملکی مجموعی سیاسی صورتحال، تحریک انصاف کی سیاسی حکمتِ عملی اور آئندہ کے اہداف پر تفصیلی تبادلۂ خیال کیا گیا۔
اس اجلاس کے بعد جاری ہونے والے اعلامیے میں کہا گیا ہے کہ اسلام آباد ہائیکورٹ کے احاطے سے چیئرمین عمران خان کے نیم فوجی دستوں (رینجرز) کے ذریعے اغوا کی شدید مذمت کی گئی ہے۔
اعلامیے میں کہا گیا ہے کہ تحریک انصاف کی قیادت نو مئی کے واقعات کو بنیاد بنا کر پاکستان تحریک انصاف کے خلاف ریاست کی سطح پر کیا جانے والا ’جھوٹا، لغو اور بے بنیاد پراپیگنڈہ‘ مسترد کرتی ہے کیونکہ پی ٹی آئی مکمل طور پر ’پُرامن، جمہوری سیاسی جماعت اور قانون کے دائرے میں سیاست کرنے کی قائل ہے۔‘
اعلامیے میں کہا گیا ہے کہ ’مشکل سے مشکل ترین حالات میں بھی تحریک انصاف اور چیئرمین عمران خان نے قانون کا دامن ہاتھ سے نہیں چھوڑا جبکہ اس جماعت کی 27 سالہ تاریخ تشدد و اشتعال سے بالکل خالی ہے۔ تین نومبر کے قاتلانہ حملے کے بعد تحریک انصاف نے ملک بھر میں ہزاروں مقامات پر احتجاج کیا مگر ایک پتھر تک نہیں اچھالا گیا جبکہ کنٹرولڈ میڈیا اور جھوٹے پراپیگنڈے کی آڑ میں ملک گیر فساد کی منصوبہ بندی کرنے والوں کو بچانے کی کوششیں کی جا رہی ہیں۔‘
تحریک انصاف نے مطالبہ کیا ہے کہ ’سپریم کورٹ کے ججز پر مشتمل اعلیٰ سطحی بااختیار کمیشن 9 مئی کو پرتشدد واقعات میں شہریوں کی ہلاکت اور انتشار پھیلانے کی کوششوں کی تحقیقات کرے۔‘
تحریک انصاف کے ان واقعات میں ہلاک ہونے والے شہریوں کے قتل کے مقدمات میں وفاقی وزیر داخلہ، پنجاب اور خیبر پختونخوا کے نگران وزرائے اعلیٰ اور آئی جیز سمیت دیگر پولیس افسران کو نامزد کرنے کا اعلان بھی کیا ہے۔
تحریک انصاف نے کہا کہ ’پی ڈی ایم کی اپنے سربراہ فضل الرحمان کی سرکردگی میں مدارس کے بچوں کے ذریعے سپریم کورٹ پر یلغار کی شدید الفاظ میں مذمت کی جانی چاہیے جبکہ پی ٹی آئی سپریم کورٹ آف پاکستان سے مکمل یکجہتی کا اظہار کرتی ہے۔‘
اعلامیے کے مطابق پنجاب کی نگران حکومت کے پاس اب برقرار رہنے کا کوئی قانونی و آئینی جواز باقی نہیں لہذا اس امر پر اتفاق کیا گیا کہ پنجاب و خیبرپختونخوا کی نگران حکومتوں کے مستقبل کے حوالے سے قانونی لائحہ عمل تیار کیا جائے گا۔
تحریک انصاف نے کہا کہ ’ملک بھر میں صاف شفاف انتخابات کا فوری انعقاد داخلی استحکام اور سیاسی و معاشی بحرانوں کے مؤثر حل کا واحد آئینی راستہ ہے۔‘
