ضلع کیچ میں ایران بارڈر پر دہشت گردوں کے حملے میں شہید سکیورٹی اہلکاروں کو پورے فوجی اعزازکے ساتھ سپرد خاک کردیا گیا۔
تفصیلات کے مطابق ضلع کیچ میں پاک ایران بارڈر پر ایرانی حدود سے دہشت گردوں کے حملے میں شہید سکیورٹی اہلکاروں کی نماز جنازہ اداکردی گئی۔
آئی ایس پی آر نے بتایا ہے نائیک شیراحمد کی نمازجنازہ کہراڑ بزدارتونسہ شریف میں ، نائیک محمداصغر کی نمازجنازہ کوٹ ادو، سپاہی نرسنگ عبدالرشید کی نمازجنازہ صحبت پور اور سپاہی محمد عرفان کی نماز جنازہ ڈیرہ غازی خان میں ادا کی گئی۔
ترجمان کا کہنا تھا کہ نمازجنازہ میں حاضرسروس وریٹائرڈ فوجی افسران،سولجرز، مختلف شعبہ ہائے زندگی سےتعلق رکھنےوالےافراداورشہدا کے عزیزواقارب نے شرکت کی۔
نماز جنازہ کی ادائیگی کے بعد شہدا کو پورے فوجی اعزازکے ساتھ سپردخاک کردیا گیا ، پاکستان کی مسلح افواج ہرقیمت پر دہشت گردی کی لعنت کے خاتمہ کے لیے پرعزم ہیں،یہ قربانیاں دہشت گردوں کے خلاف عزم کواور مضبوط کرتی ہیں۔
یاد رہے دو روز قبل پاک ایران بارڈر پر جل گئی سیکٹر میں ایرانی علاقے سے پیٹرولنگ پر مامور اہل کاروں پر فائرنگ کی گئی، دہشت گردوں کی فائرنگ سے 4 سیکیورٹی اہل کار شہید ہو گئے تھے۔
واقعے کے بعد پاکستان نے متعلقہ ایرانی حکام سے رابطہ کر کے ایکشن لینے کا مطالبہ کر کے کہا ہے کہ ایران اپنے علاقے میں دہشت گردوں کے خلاف فوری کارروائی کرے۔
