ایشین ٹائیگر

ایشین ٹائیگر
شہر خواب
صفدر علی حیدری
میچ ہو پاکستان اور انڈین کرکٹ ٹیموں کا تو گزشتہ ریکارڈ دیکھتے ہوئے اکثر پاکستانیوں کے دل کو ایک دھڑکا سا ہی لگا رہتا ہے کہ نجانے آج کیا ہو گا مگر اتوار کے روز معاملات مختلف دکھائی دئیے۔
دبئی میں ایشین کرکٹ کونسل انڈر 19ایشیا کپ کے فائنل میں پاکستان نے انڈیا کو انتہائی شاندار پرفارمنس کے بعد 191رنز سے شکست دے دی
انڈیا نے اس فائنل میچ میں ٹاس جیت کر فیلڈنگ کا فیصلہ کیا اور پاکستان کے لیے یہ فیصلہ اس صورت میں بہتر ثابت ہوا کہ اس نے پہلے بیٹنگ کرتے ہوئے انڈیا کو جیتنے کے لیے 348رنز کا بڑا ہدف دے دیا۔ پاکستان نے مقررہ 50اوورز میں آٹھ وکٹوں کے نقصان پر 347رنز بنائے۔ پاکستان کی جانب سے اوپنر سمیر منہاس نے انتہائی شاندار بیٹنگ کا مظاہرہ کیا اور 17چوکوں اور نو چھکوں کی مدد سے 113گیندوں پر 172رنز کی اننگز کھیلی۔ سمیر منہاس نے اپنی سنچری محض 71 گیندوں پر بنائی۔ واضح رہے کہ پاکستانی اوپنر سمیر منہاس اس ٹورنامنٹ کے ٹاپ سکورر بھی رہے ہیں۔ پاکستان کی جانب سے سمیر کے علاوہ سب سے زیادہ سکور احمد حسین نے 72گیندوں پر 56 رنز بنائے۔ عثمان خان نے 35، کپتان فرحان یوسف نے 19اور حمزہ ظہور نے 18رنز بنائے۔ محمد صیام 13اور نقاب شفیق 12رنز کے ساتھ ناٹ آئوٹ رہے۔ پاکستان کی پہلی وکٹ 31رنز کے مجموعی سکور پر چوتھے اوور میں گری جب اوپنر حمزہ ظہور ہنیل پٹیل کے ہاتھوں صرف 18رنز بنانے کے بعد پویلین لوٹ گئے۔ اس کے بعد پاکستانی اوپنر سمیر منہاس کا ساتھ دینے کے لیے عثمان خان کریز پر آئے اور ایک اینڈ کو 17ویں اوور تک سنبھالے رکھا تاہم اسی دوران دوسرے اینڈ سے سمیر منہاس نے اپنا جارحانہ کھیل جاری رکھا۔17ویں اوور میں عثمان کو کھیلان پٹیل نے آئوٹ کر دیا۔ انڈیا کی جانب سے دپیش دیوندرن نے تین، کھیلان پٹیل اور ہینل پٹیل نے دو دو کھلاڑیوں کو آئوٹ کیا۔
پاکستان نے انڈیا کو شکست دے کر انڈر 19ایشیا کپ کا ٹائٹل اپنے نام کر لیا مگر اس میچ میں پاکستان کے پہاڑ جیسے سکور کے پیچھے جس نوجوان کا ہاتھ تھا، اسے لمبی اننگز کھیلنے کا بہت شوق ہے۔ یہ پہلا موقع نہیں جب سمیر منہاس نے ایک بڑی اننگز کھیل کر ٹیم کو اچھا آغاز فراہم کیا ہو۔ اسی ایونٹ کے مجموعی طور پر دوسرے اور پاکستان پہلے میچ میں انہوں نے ملائیشیا کے خلاف 177رنز کی ناقابل شکست اننگز کھیلی تھی۔ ملائیشیا کے خلاف اننگز میں انہوں نے 11چوکے اور آٹھ چھکے مارے تھے۔ صرف 19سال اور 19دن کی عمر میں دو بڑی اننگز کھیلنے والے سمیر منہاس دو دسمبر سنہ 2006ء کو ملتان میں پیدا ہوئے۔ دائیں ہاتھ کے اوپننگ بلے باز کا تعلق ایک ایسے خاندان سے ہے جس میں پہلے ہی سے ایک اور انٹرنیشنل کرکٹر موجود ہے۔ وہ پاکستان کی چار ٹی20انٹرنیشنل میچوں میں نمائندگی کرنے والے عرفات منہاس کے چھوٹے بھائی ہیں، جنہوں نے 2023ء اور 2024ء میں ہانگ کانگ، افغانستان، بنگلہ دیش اور زمبابوے کے خلاف گرین شرٹس کی نمائندگی کی۔ سمیر منہاس ان نوجوان کھلاڑیوں میں سے ایک ہیں جو پاکستان کرکٹ بورڈ کے پاتھ وے سسٹم سے سامنے آئے ہیں۔ پاکستان انڈر 19کی نمائندگی کرنے سے پہلے وہ ملتان ریجن انڈر 13، سدرن پنجاب انڈر 16، ملتان انڈر 19 ور ملتان ریجن انڈر 19کی نمائندگی کر چکے ہیں۔
گزشتہ ماہ تک پاکستان کرکٹ بورڈ کے یوتھ ڈویلپمنٹ پروگرام کے سربراہ کے طور پر کام کرنے والے سابق کپتان اظہر علی نے سمیر منہاس کو مستقبل کے لیے ایک اچھا آپشن قرار دیا۔ صحافی عمیر علوی سے گفتگو کرتے ہوئے ان کا کہنا تھا جب انہوں نے پہلی مرتبہ سمیر منہاس کو رواں سال کراچی کے تربیتی کیمپ میں دیکھا تھا، تب ہی نوجوان کرکٹر نے انھیں متاثر کیا تھا۔ اس کی کریز پر کھڑے ہونے کی تکنیک بہت اچھی لگی تھی اور شاٹ سلیکشن بھی، اگر اس پر محنت کی جائے تو پاکستان کے لیے مستقبل میں بھی اچھا کھلاڑی ثابت ہوسکتا ہے۔ بقول اظہر علی سمیر منہاس کی کامیابی کے پیچھے پاکستان کرکٹ بورڈ کے پاتھ وے سسٹم کا ہاتھ ہے جس کے ذریعے وہ سامنے آئے ہیں۔ وہ ہر ایج گروپ لیول پر اچھی پرفارمنس دیتے رہے ہیں جس کی وجہ سے انھیں ورلڈ کپ اور ایشیا کپ سے پہلے لگائے گئے تربیتی کیمپ میں شامل کیا گیا۔ چار مہینے پہلے تربیتی کیمپ میں سمیر منہاس نے بڑی محنت کی جس کا نتیجہ آج سب کے سامنے ہے۔ وہ نہ صرف ایک اچھے ٹاپ آرڈر بلے باز ہیں بلکہ بہترین فیلڈر بھی ہیں جو مستقبل میں پاکستان کی نمائندگی کر سکتے ہیں۔ اظہر علی کا کہنا تھا کہ ایشیا کپ میں دو سنچریاں بنانے والے سمیر ڈومیسٹک انڈر19ایونٹ میں بھی ٹاپ سکورر رہے، جہاں انہوں نے دو سنچریاں سکور کر کے اپنی فارم سے سلیکٹرز کو متوجہ کیا تھا۔ ان کے مطابق ملائشیا انڈر 19کے خلاف سمیر منہاس کی سنچر ی کو بھلایا نہیں جا سکتا جبکہ انڈیا کے خلاف ناک آٹ مرحلے میں ان کی جارحانہ اور ذمہ دارانہ بلے بازی ان کے ٹیلنٹ کا منہ بولتا ثبوت ہے۔
پاکستان کی نیشنل کرکٹ ٹیم کے اوپنر اور جارحانہ کھیل کی وجہ سے جانے پہچانے جانے والے صاحبزادہ فرحان نے سمیر منہاس کی فائنل میچ میں انڈیا کے خلاف بیٹنگ کے دوران لی جانے والی ایک تصویر ایکس پر شئیر کی اور اس کے ساتھ انہوں نے لکھا کہ کیا کمال کا کھلاڑی ہے سمیر منہاس۔ پاکستان کرکٹ ٹیم کے سابق کپتان راشد لطیف نے ایکس پر لکھا کہ سمیر منہاس ایشیا کپ انڈر 19ٹورنامنٹ میں بہت مستقل مزاج رہے، اس ایونٹ میں 471رنز بنائے۔ کیا کمال کی پرفارمنس تھی۔
خوشیوں کو ترسی ہوئی پاکستانی قوم کے لیے یقیناً یہ خبر بڑی خوش آئند ہے کہ ہم نے روایتی حریف کو دھول چٹا دی ہے ۔ اب قوم دعا کر رہی ہے کہ انڈر 19کے ہیرو قومی ٹیم کے بھی اسی طرح ہیرو ثابت ہوں، جیسے ماضی میں انضمام، مشتاق احمد ، وقار یونس ، عاقب جاوید اور سعید انور جیسے مایہ ناز کھلاڑی انڈر 19سے قومی ٹیم میں آئے اور سپر اسٹار بنے۔