سپریم کورٹ نے نکاح نامہ کے شرائط و ضوابط کے حوالے سے فیصلے میں واضح کیا ہے کہ ابہام کی صورت میں لڑکی یا لڑکے میں سے کسے فائدہ ملے گا۔
تفصیلات کے مطابق سپریم کورٹ نے اپنے فیصلے میں کہا ہے کہ نکاح نامے کی شرائط و ضوابط یا کسی کالم میں ابہام ہو تو اس کا فائدہ بیوی کو ملے گا، نکاح نامے میں شرائط طے کرنے سے قبل دلہن کو رضامندی کی آزادی ہے.
جسٹس امین الدین خان اور جسٹس اطہرمن اللہ پر مشتمل 2 رکنی بینچ نے نکاح نامہ شرائط کے حوالے سے تفصیلی فیصلہ جاری کیا۔
فیصلے میں کہا گیا کہ اگر نکاح نامے کے کسی کالم میں ابہام ہو تو اس کا فائدہ لڑکی کو حاصل ہوگا، دلہن کے بغیر مشاورت پُر کیے گئے کالمز کو اس کے حقوق کے خلاف استعمال نہیں کیا جاسکتا۔
سپریم کورٹ نے مزید کہا کہ عدالتوں کو نکاح نامے کی تشریح کرنے سےقبل دیکھنا چاہیے کہ دلہن کو رضامندی کی آزادی تھی۔
