محمد ریاض ایڈووکیٹ
پارلیمنٹ سے بل کی منظوری کے بعد رواں ماہ صدر پاکستان نے نیشنل اینٹی منی لانڈرنگ اینڈ کائونٹر فنانسنگ آف ٹیرر ازم اتھارٹی ایکٹ کی منظوری دے دی۔ آج کی تحریر میں اس قانون کے اہم مندرجات : اتھارٹی قائم کرنے کے لئے قانون سازی کے مقاصد، اتھارٹی کی تشکیل و افعال کو اجاگر کرنے کی کوشش کریں گے۔
اتھارٹی قائم کرنے کی وجوہات و مقاصد :
منی لانڈرنگ اور دہشت گردی کا خطرہ ریاست کے لیے ایک وجودی خطرہ بنتا جا رہا ہے اور اس کا بھرپور جواب دینے اور اس سے نمٹنے کی ضرورت ہے اور جبکہ پاکستان بین الاقوامی برادری کا ذمہ دار اور فعال رکن ہونے کے ناطے دنیا کیساتھ مسلسل تعاون کر رہا ہے اور بین الاقوامی سطح پر تسلیم شدہ اقدامات کو اپنا رہا ہے، خاص طور پر متعلقہ بین الاقوامی اداروں کی طرف سے تجویز کردہ انسداد منی لانڈرنگ، دہشت گردی کی مالی معاونت کے انسداد اور ٹارگٹڈ مالیات کے لیے پاکستان تعاون کر رہا ہے۔ جہاں پاکستان میں مختلف وفاقی اور صوبائی ادارے، محکمے، وزارتیں اور ادارے انسداد منی لانڈرنگ، دہشت گردی کی مالی معاونت کے انسداد اور مختلف قوانین کے تحت مالیاتی پابندیوں کے اہداف پر عمل پیرا ہیں وہیں پر ریاست پاکستان میں مطلوبہ قانونی اور ریگولیٹری فریم ورک کو فروغ دینے ، اور اداروں کے درمیان باہمی ہم آہنگی قائم کرنے کے لئے ایک فوکل ادارے کی ضرورت ہے۔ ایسے ادارے کے بنیادی مقاصد، افعال میں ایک جامع اسٹریٹجک منصوبہ بندی اور ضروری ذیلی میکانزم کے ذریعے حکومت کی پالیسی کی منصوبہ بندی، یکجا، ہم آہنگی اور نفاذ کے ذریعے ریاستی ردعمل کو متحد کرنا اور بین الاقوامی سطح پر ہم آہنگی اور تعاون کرنا شامل ہوگا۔
صدر دفتر:
اتھارٹی کا ہیڈ کوارٹر اسلام آباد میں ہوگا اور اتھارٹی کے ذیلی دفاتر پاکستان کے دیگر شہروں میں بھی قائم کئے جاسکتے ہیں۔
اتھارٹی کی تشکیل:
اتھارٹی کا ایک چیئرمین ہوگا جسے وزیراعظم تین سال کی مدت کے لیے مقرر کرے گا۔ چیئرمین کے علاوہ دیگر ممبران میں سیکرٹری وزارت خزانہ، سیکرٹری وزارت خارجہ، سیکرٹری وزارت داخلہ، گورنر سٹیٹ بینک آف پاکستان، چیئرمین، سیکیورٹیز اینڈ ایکسچینج کمیشن آف پاکستان، چیئرمین قومی احتساب بیورو، ڈائریکٹر جنرل وفاقی تحقیقاتی ایجنسی، ڈائریکٹر جنرل اینٹی نارکوٹکس فورس، چیئرمین فیڈرل بورڈ آف ریونیو، ڈائریکٹر جنرل فنانشل مانیٹرنگ یونٹ، نیشنل کوآرڈینیٹر، نیشنل کائونٹر ٹیررازم اتھارٹی، آزاد جموں و کشمیر اور گلگت بلتستان سمیت ہر صوبے کیچیف سیکرٹری کی جانب سے ایک افسر جو اکیسویں گریڈ سے کم درجہ کا نہ ہو، اس کے علاوہ کوئی ایسا اور ممبر جس کو وزیراعظم نامزد کرے۔ اس اتھارٹی کا ایک ڈائریکٹر جنرل بھی ہوگا۔
اتھارٹی کے اختیارات اور افعال:
اتھارٹی متعلقہ مجاز حکام کے ذریعے عمل درآمد کے لیے ایک اعلیٰ ادارے کے طور پر کام کرے گی۔ اتھارٹی کو درج ذیل اختیارات اور افعال حاصل ہوں گے: فنانشل ایکشن ٹاسک فورس اور متعلقہ بین الاقوامی اداروں، باڈیز کے لیے فوکل پوائنٹ کے طور پر کام کرنا اور اینٹی منی لانڈرنگ، کائونٹرنگ سے متعلق شعبوں میں تعاون کو آسان بنانے کے لیے مجاز حکام اور دیگر قومی، بین الاقوامی تنظیموں اور اداروں کے ساتھ رابطہ قائم کرنا۔ انسداد منی لانڈرنگ کے حوالے سے متعلقہ قوانین کے تحت دہشت گردی کی مالی معاونت اور ہدف شدہ مالیاتی پابندیاں لاگو کرنا اور چیلنجز سے نمٹنے کے لئے قومی حکمت عملی کے نفاذ کے لیے مربوط نگرانی اور عمل درآمد کے لیے قومی ایکشن پلان کی منظوری دینا۔ وقتاً فوقتاً، اینٹی منی لانڈرنگ سے متعلق قومی پالیسیوں، قوانین اور ضوابط کا جائزہ لینا، دہشت گردی کی مالی معاونت کا مقابلہ کرنا اور ہدف شدہ مالیاتی پابندیوں کا جائزہ لینا اور وفاقی حکومت کو ترامیم کی تجویز دینا۔ قومی سطح پر یکسانیت برقرار رکھنے کے لیے اداروں کے درمیان ہم آہنگی پیدا کرنا اور وفاقی صوبائی، مقامی مجاز حکام اور صوبائی حکومتوں کو اینٹی منی لانڈرنگ کے نفاذ، دہشت گردی کی مالی معاونت کا مقابلہ کرنے اور مالیاتی پابندیوں کے ہدف کے نظام کے بارے میں پالیسی مشورے فراہم کرنا۔ اتھارٹی کے ملازمین کے قواعد و ضوابط اور شرائط وضع کرنا اور وفاقی حکومت کی منظوری کے بعد فنانس ڈویژن کی مشاورت سے اضافی الائونسز، انعامات یا دیگر مراعات دینا۔ ہم منصب قومی یا بین الاقوامی تنظیموں کے ساتھ کسی بھی معاہدے، مفاہمت کی یادداشت یا پروٹوکول قائم کرنا۔ منی لانڈرنگ، دہشت گردی کی مالی معاونت اور ٹارگٹڈ مالیاتی پابندیوں سے متعلق قومی اہمیت کے کسی دوسرے مسئلے پر بات چیت اور غور و خوض کرنا۔
قومی اداروں کا تعاون:
معلومات کی رسائی اور اتھارٹی کے دیگر مقاصد کی تکمیل کے لئے وفاقی اور صوبائی متعلقہ ادارے، اتھارٹی کی مدد کریں گے۔ اس مقصد کے لئے، ڈائریکٹر جنرل یا اس کے ذریعے اختیار کردہ کوئی بھی افسر تمام وفاقی وزارتوں، صوبائی محکموں اور کسی بھی مجاز اتھارٹی سے حسب ضرورت معلومات اور ڈیٹا طلب کر سکتا ہے۔ اس ایکٹ کے تحت اتھارٹی کو فراہم کردہ تمام معلومات اور ڈیٹا کو خفیہ رکھا جائے گا اور اس ایکٹ کے مقاصد کے علاوہ کسی اور قومی یا بین الاقوامی ادارے کو ظاہر نہیں کیا جائے گا۔ اس ایکٹ کی کسی بھی شق کی خلاف ورزی یا کسی بھی مجاز اتھارٹی کے کسی اہلکار کی طرف سے انسداد منی لانڈرنگ انسداد دہشت گردی کی مالی معاونت اور ہدف بنائے گئے مالیاتی پابندیوں سے متعلق کسی قانون کی خلاف ورزی یا عدم نفاذ پر، اتھارٹی متعلقہ قانون کے تحت ایسے اہلکار کے لئے مناسب تادیبی کارروائی کی سفارش کرے گی۔
