سائٹ ایریا میں گزشتہ روز ہونے والے اندوہناک سانحے میں ہونے والی اموات پر پولیس نے فیکٹری مالک سمیت8ملزمان کو گرفتار کرلیا۔
اس حوالے سے پولیس حکام کا کہنا ہے کہ مقدمے میں نامزد فیکٹری مالک،2منیجر سمیت8ملزمان کو حراست میں لیا گیا ہے، فیکٹری مالک عبدالخالق نے بیرون ملک ہونے سے متعلق غلط بیانی کی تھی۔
ملزمان کیخلاف درج کیے گئے مقدمے میں لاپرواہی اورغفلت کی دفعات شامل کی گئی ہیں، متن میں لکھا گیا ہے کہ زکوٰة کی تقسیم کے دوران بھگڈر مچنے سے اموات واقع ہوئیں۔
ایف آئی آر کے مطابق فیکٹری مالک کی جانب سے منیجر جسیم اور اسلام زکوٰة تقسیم کررہے تھے، فیکٹری انتظامیہ نے زکوٰة تقسیم سے متعلق ضلعی انتظامیہ اور پولیس کو لاعلم رکھا۔
زکوٰة تقسیم کے دوران فیکٹری چوکیدارحسن نے مین گیٹ کے ساتھ چھوٹا گیٹ بھی کھولا، چھوٹا گیٹ کھلا تو خواتین اور بچے اندر داخل ہوئے، واقعے میں بھگدڑ مچنے سےخواتین اوربچوں سمیت12افراد جاں بحق ہوئے۔
