یمن کا اسرائیل پر نئے میزائل حملوں کا دعویٰ، بحیرہ احمر میں اسرائیلی مفادات کو نشانہ بنانے کا اعلان
یمن کی مسلح افواج نے دعویٰ کیا ہے کہ انہوں نے اسرائیل کے شہر یافا اور دیگر حساس مقامات کو متعدد میزائل حملوں کا نشانہ بنایا، جن میں تمام مقررہ اہداف کامیابی کے ساتھ حاصل کر لیے گئے۔
یمنی فوج کی جانب سے جاری بیان میں کہا گیا ہے کہ یہ کارروائیاں ایران، فلسطین، لبنان، عراق اور یمن میں امریکہ اور اسرائیل کی مبینہ فوجی کارروائیوں اور جارحیت کے ردعمل میں کی گئی ہیں۔
بیان کے مطابق یمنی افواج نے اس منصوبے کی بھی مخالفت کی ہے جسے وہ ’’گریٹر اسرائیل‘‘ اور ’’نئے مشرقِ وسطیٰ‘‘ کی اسرائیلی حکمتِ عملی قرار دیتی ہیں۔ یمنی قیادت نے خطے کے عوام پر عائد مبینہ معاشی اور عسکری دباؤ کے خاتمے اور محاصروں کو توڑنے کے عزم کا بھی اظہار کیا ہے۔
سوشل میڈیا پلیٹ فارم ایکس پر جاری اعلامیے میں یمنی فوج کا کہنا تھا کہ بحری محاذ پر اسرائیلی نقل و حرکت کے خلاف مکمل پابندی عائد کر دی گئی ہے اور بحیرہ احمر میں موجود اسرائیلی مفادات اور تنصیبات کو جائز فوجی اہداف تصور کیا جائے گا۔
بیان میں مزید کہا گیا کہ خطے میں جاری کشیدگی کے تناظر میں آئندہ دنوں میں مزید فوجی کارروائیاں کی جا سکتی ہیں، جبکہ صورتحال کے مطابق آپریشنز کے دائرہ کار میں بھی اضافہ کیا جائے گا۔
یمنی فوج نے اپنے مؤقف کا اعادہ کرتے ہوئے کہا کہ امریکہ اور اسرائیل کی مبینہ جارحیت اور محاصرے کے خاتمے تک کارروائیاں جاری رکھی جائیں گی۔ ساتھ ہی یہ دعویٰ بھی کیا گیا کہ خطے پر دباؤ بڑھانے اور محاصرے کی تمام کوششیں ناکام ثابت ہوں گی۔
یاد رہے کہ مشرقِ وسطیٰ میں حالیہ کشیدگی کے دوران یمن، ایران اور اسرائیل کے درمیان بڑھتے ہوئے تنازع نے علاقائی سلامتی کے حوالے سے نئی تشویشات کو جنم دیا ہے۔
