کیا یہ شہباز حکومت کا یو ٹرن ہے؟

حکومت نے صنعتی شعبے کے لیے خام مال، انٹرمیڈیٹ گڈز اور دیگر اشیاء کی درآمد پر پابندی ختم کرنے کا اعلان کر دیا۔

تفصیلات کے مطابق شہباز حکومت نے لگژری مصنوعات پر پابندی پر یوٹرن لیتے ہوئے صنعتی شعبے کے لیے خام مال، انٹرمیڈیٹ گڈز اور دیگر اشیاء کی تیاری میں استعمال ہونے والی تیار مصنوعات اور مشینری کی درآمد پر پابندی ختم  کردی۔

ذرائع کا کہنا ہے کہ وزارت تجارت جلد ہی ان اشیا کی فہرست پر کام کرے گی، جو 19 مئی کو جاری کردہ ایس آر او 598 کے تحت پابندی والے کسٹم کوڈ میں نادانستہ طور پر شامل ہوگئی ہیں۔

ذرائع نے بتایا کہ ہمیں صنعتوں سے کئی شکایات موصول ہوئی ہیں، اس سے قبل 25 مئی کو پہلی وضاحت جاری کی گئی تھی، جس میں حکومت نے جانوروں کی خوراک اور انرجی سیورز پر عائد پابندی ہٹا دی تھی۔

اس حوالے سے وزارت تجارت نے وضاحتی نوٹی فکیشن میں کہا گیا تھا کہ 19 مئی کو لگژری اور غیر ضروری اشیا کی درآمد پر پابندی لگائی گئی تھی تاہم شکایات پر نوٹیفکیشن میں خامیاں دور کر رہے ہیں۔

ذرائع وزارت تجارت کے مطابق انڈسٹری نے مختلف خام مال درآمد پر پابندی ختم کرنے کی تجاویز دی ہیں ، تجاویز پر ایف بی آر کے ساتھ مشاورت کررہے ہیں، مختلف خام مال کی درآمد پر بھی پابندی سے استثنیٰ دینے کی تجویز ہے۔