پنجاب کے دارالخلافہ لاہور شہر میں گزشتہ 24 گھنٹے کے دوران مختلف نوعیت کے جرائم کی 503 وارداتیں رپورٹ ہوئی ہیں۔
لاہور پولیس کے مطابق شہر میں گزشتہ 24 گھنٹے کے دوران مختلف علاقوں سے جرائم کی 503 وارداتوں کی رپورٹ درج کرائی گئی ہیں، ان میں چوری، ڈکیتی، رہزنی کی وارداتیں شامل ہیں۔
پولیس کے مطابق چور مختلف علاقوں میں 13 گھروں سے لاکھوں روپے کا سامان لے اڑے، ڈاکوؤں نے مختلف مقامات سے 38 افراد سے مجموعی طور پر لاکھوں روپے اور درجنوں موبائل فونز چھینے۔
ڈاکوؤں نے جھپٹا مار کر 65 شہریوں سے شاہراہ عام پر ہزاروں روپے اور موبائل فونز چھینے، اس کے علاوہ ڈاکوؤں نے مختلف مقامات پر 6 شہریوں سے موٹر سائیکل اورنقدی چھین لی۔
پولیس نے بتایا کہ شہر میں 65 موٹر سائیکلوں، ایک کار، 10 دیگر گاڑیوں سمیت چوری کی 305 وارداتیں رپورٹ ہوئیں جب کہ ناجائز اسلحہ کے 32، منشیات کے 52 مقدمات درج کیے گئے۔
پولیس کے مطابق آپریشن اور انویسٹی گیشن ونگ نے 90 اشتہاری اور 80 عدالتی مفرور ملزمان کو پکڑا۔
