بلوچستان میں بارشوں سے ایک بار پھر تباہی اور ہلاکتیں

صوبہ بلوچستان کے بیشتر علاقوں میں بارشوں کا سلسلہ جاری ہے، بارشوں اور مختلف حادثات میں اب تک کئی ہلاکتیں ہوچکی ہیں۔

تفصیلات کے مطابق صوبائی ڈیزاسٹر مینجمنٹ اتھارٹی (پی ڈی ایم اے) کا کہنا ہے کہ بارشوں کے بعد پنجگور میں دیوار گرنے سے 2 افراد جاں بحق ہوئے، بارشوں سے خضدار میں 2، لسبیلہ اور کیچ میں 1،1 ہلاکت رپورٹ ہوئی۔

دوسری جانب محکمہ موسمیات نے بلوچستان کے مختلف علاقوں میں آئندہ 24 گھنٹے کے دوران مزید بارشوں کی پیش گوئی کی ہے۔

محکمہ موسمیات کے مطابق قلات، خصدار، زیارت اور بارکھان میں آندھی اور گرج چمک کے ساتھ بارش کا امکان ہے۔

وزیر اعلیٰ بلوچستان قدوس بزنجو نے بارشوں سے نقصان پر افسوس کا اظہار کرتے ہوئے تمام متعلقہ اداروں اور ضلعی انتظامیہ کو الرٹ رہنے کی ہدایت کی ہے