پنجاب کے شہر صادق آباد میں کچے کے علاقے میں ڈاکوؤں کے خلاف گرینڈ آپریشن کا آج نواں روز ہے، پولیس کی جانب سے ڈاکوؤں کے دوگروہوں کے 8 کارندوں کو گرفتار کرنے کا دعویٰ کیا گیا ہے۔
تفصیلات کے مطابق پولیس نے صادق آباد کے کچے میں فریدا کوکانی اور شبیر لاٹھانی کے ٹھکانوں پربھرپور کارروائی کی اس دوران دونوں گینگز کے 8 ملزمان کو گرفتار کیا گیا ہے۔
ترجمان پولیس کا کہنا ہے کہ اب تک کل14 ڈاکو گرفتار اور 3 ہلاک ہوچکے ہیں، ملزمان کے قبضے سے کلاشنکوفیں اور گولیؤں کے متعدد راؤنڈزبرآمد ہوئے، اس کے علاوہ پولیس نے کوکانی گینگ کی کمین گاہ کو بھی نذرآتش کردیا۔
پولیس کے مطابق گرفتار ملزمان اغواء برائے تاوان کی متعدد وارداتوں میں ملوث ہیں جن سے بڑی تعداد میں اسلحہ برآمد ہوا ہے جبکہ پولیس نے علاقے کا کنٹرول سنبھال لیا ہے۔
واضح رہے کہ وفاقی کابینہ نے کچے کے علاقے میں آپریشن کیلئے فوج کی تعیناتی کی منظوری سرکولیشن سمری کے ذریعے دی تھی
