صارفین کے لیے گوگل کروم کا زبردست تحفہ

معروف ٹیکنالوجی کمپنی گوگل نے صارفین کو خوشخبری سناتے ہوئے ویب براؤزر گوگل کروم میں چند نئے فیچرز کا اضافہ کیا ہے۔

ٹیکنالوجی کمپنی گوگل کروم کا نیا 123 ورژن مارچ میں صارفین کے لئے متعارف کرایا جائے گا، جس کا ابھی بیٹا (beta) ورژن جاری کیا گیا ہے۔

ایک فیچر اینڈرائیڈ ڈیوائسز میں پی ڈی ایف ریڈر کو کروم براؤزر کا حصہ بنانے کے حوالے سے متعارف کرایا گیا ہے۔

کروم براؤزر کے ڈیسک ٹاپ ورژن میں پی ڈی ایف ریڈر کا استعمال کا فی وقت سے کیا جارہا ہے، مگر اب اینڈرائیڈ سمارٹ فونز کے لیے یہ فیچر متعارف کرایا جا رہا ہے۔

اس فیچر سے اینڈرائیڈ ڈیوائسز میں پی ڈی ایف فائلز کو ڈاؤن لوڈ کرنے کی ضرورت نہیں رہے گی بلکہ وہ ویب براؤزر میں ہی اوپن ہو جائیں گی۔

ایک اور نیا فیچر ٹیب گروپ شیئرنگ سے متعلق ہے، اس فیچر سے آپ کروم پر لنکس کی بجائے ٹیب گروپس کو شیئر کرسکیں گے، یہ فیچر اینڈرائیڈ ڈیوائسز اور ڈیسک ٹاپ ورژن کے کروم صارفین کے لیے متعارف کرایا جائے گا۔

اسی طرح کروم 123 میں مختلف ڈیوائسز میں سوئچ کرنے کا عمل بھی آسان اور سہل بنایا جارہا ہے، گوگل کی جانب سے اس کے لیے ایک نیا Resume tabs آپشن کروم براؤزر کا حصہ بنایا جا رہا ہے۔

اس آپشن کے تحت دیگر ڈیوائسز میں اوپن کیے گئے ٹیبز کو کسی نئی ڈیوائس کے ٹیب پیج میں دکھایا جائے گا۔یہ فیچر ڈیسک ٹاپ، اینڈرائیڈ اور آئی او ایس صارفین کے لیے دستیاب ہوگا۔

ایک نیا فیچر کروم کے ڈیسک ٹاپ ورژن میں اینڈرائیڈ جیسے میڈیا پلیئر سے متعلق پیش کیا گیا ہے، کروم 123 کے ڈیسک ٹاپ ورژن میں ایک نیا میڈیا پلیئر ویب براؤزر کا حصہ بنے گا۔

اس طرح کا میڈیا پلیئر ابھی گوگل پکسلز فونز میں دیکھنے میں آتا ہے جس میں پلے بیک اور کاسٹنگ بٹنز کو تبدیل کیا جائے گا۔