لوڈ شیڈنگ سے پریشان پاکستانی عوام پر بجلی بم گرانے کا سلسلہ بدستور جاری ہے، بنیادی ٹیرف اور ٹیکسز کی مد میں گھریلو صارفین فی یونٹ 59 روپے ادا کررہے ہیں۔
تفصیلات کے مطابق وفاقی حکومت کی جانب سے بجلی کی قیمتوں میں مسلسل اضافہ جاری ہے ،گھریلو صارفین کو اوسطً فی یونٹ قیمت 59 روپے کی بلند ترین سطح پر پہنچ گئی۔
ذرائع کے مطابق بجلی کے بنیادی ٹیرف اور ٹیکسز شامل ہونے سے یونٹ قیمت59روپے تک پہنچ چکی ہے، حکومت نے کچھ روز قبل بجلی کے بنیادی ٹیرف میں سات روپے فی یونٹ کا اضافہ کیا تھا۔
فیول پرائس ایڈجسٹمنٹ، الیکٹرک سٹی ڈیوٹی شامل کرنےسےقیمت میں ہوشربا اضافہ ہوا، فیول پرائس ایڈجسٹمنٹ کی رقم پر بھی اضافی ٹیکس لگا کر بلوں میں شامل کیا گیا۔
کوارٹر ٹیرف ایڈجسٹمنٹ، انکم ٹیکس، پی ٹی وی فیس کے علاوہ ایف سی سرچارج کو بلوں میں شامل کیا گیا ہے، جنرل سیلز ٹیکس سمیت دیگر چارچز شامل کرنے کی وجہ سے قیمت میں اضافہ ہوا ہے، صارفین کو رواں ماہ کی بلنگ نئے ٹیرف کے مطابق شروع ہوچکی ہے۔
یاد رہے کہ حکومت نے بجلی صارفین پر 144 ارب 69 کروڑ پر اضافی بوجھ ڈالنے کی تیاری کر لی گئی، بجلی کی تقسیم کار کمپنیوں نے صارفین پر اضافی بوجھ کے لئے نیپرا سے رجوع کر لیا۔
نیپرا سے سہ ماہی ایڈجسٹمنٹ کی مد میں 144 ارب 69 کروڑ روپے اضافے کی درخواست کی گئی ہے، نیپرا اتھارٹی ڈسکوز کی درخواست پر 23 اگست کو سماعت کرے گی
