صوبہ سندھ کے ضلع سجاول میں نومولود کی پیدائش پر فائرنگ نے گھر کو ماتم کدے میں تبدیل کردیا۔
تفصیلات کے مطابق افسوسناک واقعہ سجاول کے گاؤں لاکھا میں پیش آیا ، نومولود کی پیدائش کی خوشی میں ایک تقریب کا اہتمام کیا گیا ۔
تقریب میں موجود بچی کے ماموں نے فائرنگ کردی جس کے نتیجے میں پانچ روز کی نومولود شہزادی نامی بچی ہی جاں بحق ہوگئی،اہل علاقہ کے مطابق گھر میں ‘چھٹی’ کی تقریب کے دوران یہ افسوسناک واقعہ پیش آیا۔
واقعے کی اطلاع ملنے پر مقامی پولیس جائے حادثے پر پہنچی اور منصور شیخ نامی شخص کو گرفتار کرتے ہوئے اس سے اسلحہ برآمد کرلیا جبکہ بچی کی لاش کو ضابطے کی کارروائی کے لئے ہسپتال منتقل کردیا گیا ہے۔
واقعے سے متعلق بچی کی والدہ کا کہنا ہے کہ پستول بھائی کی گود میں تھا اچانک چل گیا، واقعے میں میرے بھائی منصور شیخ کا کوئی قصور نہیں، پولیس نے بلاوجہ گرفتار کیا ہے ۔
