گرینڈ اپوزیشن الائنس کی طرف بڑھ رہے ہیں، جمعیت علمائے اسلام (ف)

ترجمان جمعیت علمائے اسلام (ف) اسلم غوری نے کہا ہے کہ مولانا فضل الرحمٰن کے اتحاد میں شمولیت سے اپوزیشن مزید مضبوط ہوگی، آہستہ آہستہ گرینڈ الائنس کی طرف بڑھ رہے ہیں۔

سماجی رابطے کی ویب سائٹ فیس بک پر جاری ایک بیان میں اسلام غوری کا کہنا تھا کہ جے یو آئی (ف) کی اپوزیشن اتحاد میں شمولیت کے خبروں سے کچھ حلقوں کو تکلیف ہے، جن کو تکلیف ہے وہی بے بنیاد خبریں چلوا رہے ہیں

اسلم غوری کا کہنا تھا کہ بغیر سربراہی کے ہی مولانا فضل الرحمٰن اپوزیشن اتحاد میں اہم کردار ادا کر رہے ہیں، سربراہ جمعیت علمائے اسلام (ف) کا قائدانہ کردار اب کسی عہدے کا محتاج نہیں۔

ترجمان جے یو آئی (ف) نے کہا کہ مولانا فضل الرحمٰن کے اتحاد میں شمولیت سے اپوزیشن مزید مضبوط ہوگی، ہم آہستہ آہستہ گرینڈ الائنس کی طرف بڑھ رہے ہیں۔

اسلم غوری کا کہنا تھا کہ مولانا فضل الرحمٰن کی پارلیمنٹ میں تقریر کے بعد ان کی کردار کشی کی مہم چلائی جا رہی ہے، اس طرح کے بیانات اپوزیشن کے درمیان فاصلے کم کر رہے ہیں۔

ترجمان جے یو آئی (ف) نے کہا کہ قوم جانتی ہے کہ فصلی بٹیرے کہاں سے متحرک ہوتے ہیں