پی ٹی آئی اور جے یو آئی(ف) کے وفد کی ملاقات، کمیٹیوں کی تشکیل پر اتفاق

جمعیت علمائے اسلام کے سربراہ مولانا فضل الرحمٰن سے پاکستان تحریک انصاف(پی ٹی آئی) کے وفود نے ملاقات کی جس میں دونوں جماعتوں نے ایک کمیٹی تشکیل دینے پر اتفاق کیا۔

بیرسٹر گوہر علی خان کی قیادت میں پی ٹی آئی وفد نے مولانا فضل الرحمٰن سے ان کی رہائش گاہ پر ملاقات کی جس میں ملکی سیاسی صورتحال اور اپوزیشن کی آئندہ کی حکمت عملی کے حوالے سے امور پر تبادلہ خیال کیا گیا۔

دونوں جماعتوں کے درمیان دو کمیٹیاں تشکیل دینے پر اتفاق ہوا جو قومی اسمبلی اور سینیٹ میں قانون سازی سے متعلق مشاورت کریں گی۔

سینیٹ میں دو رکنی کمیٹی شبلی فراز اور سینیٹر کامران مرتضیٰ جبکہ قومی اسمبلی میں بیرسٹر گوہر اور مولانا عبدالغفور حیدری پر مشتمل ہو گی۔

ملاقات کے بعد میڈیا سے گفتگو میں پی ٹی آئی رہنما رؤف حسن نے مولانا فضل الرحمٰن کے ساتھ ہونے والی ملاقات کو خوش آئند قرار دیا۔

انہوں نے کہا کہ کمیٹی کی سطح پر یہ پہلی میٹنگ ہے، قومی اسمبلی اور سینیٹ میں ہماری کمیٹیاں باہمی مشاورت سے آگے بڑھنے کا فیصلہ کریں گی۔

جمعیت علمائے اسلام کے رہنما مولانا ضیا الرحمٰن نے بتایا کہ کمیٹی کی تشکیل ہوگئی ہے اور قومی اسمبلی اور سینیٹ میں قانون سازی سے متعلق تمام معاملات کمیٹیاں آپس میں مل بیٹھ کر طے کریں گی۔