گیس چوری کے خلاف کریک ڈاؤن: 34 کنکشن منقطع، 6 لاکھ سے زائد کے جرمانے
سوئی ناردرن گیس پائپ لائنز لمیٹڈ (SNGPL) نے گیس چوری کے خلاف جاری کریک ڈاؤن میں مزید شدت پیدا کرتے ہوئے پنجاب، خیبر پختونخوا اور اسلام آباد کے مختلف علاقوں میں کارروائیاں کیں۔ ان کارروائیوں کے نتیجے میں 34 غیر قانونی گیس کنکشن منقطع کیے گئے اور مجموعی طور پر 6 لاکھ سے زائد کے جرمانے عائد کیے گئے۔
لاہور میں سوئی ناردرن کی ٹیم نے گیس کے غیر قانونی استعمال پر 9 کنکشن منقطع کیے اور 50 ہزار روپے کے جرمانے بھی عائد کیے۔ ملتان میں ٹیم نے 10 غیر قانونی کنکشن منقطع کیے۔ مردان میں ریجنل ٹیم نے 5 کنکشن منقطع کیے اور 1 لاکھ 60 ہزار روپے کے جرمانے عائد کیے۔ شیخوپورہ میں گیس چوری کے کیسز میں 4 لاکھ روپے سے زائد کے جرمانے عائد کیے گئے۔ بہاولپور میں کمپریسر کے استعمال پر 8 کنکشن منقطع کیے گئے، جبکہ فیصل آباد میں ٹیم نے 2 غیر قانونی کنکشن منقطع کیے اور 40 ہزار روپے کے جرمانے عائد کیے۔
