مظفرآباد پولیس نے شاعر احمد فرہاد کی فیملی سے ملاقات کروا دی

آزاد کشمیر میں کارِ سرکار میں مداخلت کے الزامات کے تحت گرفتار شاعر احمد فرہاد کی ملاقات اُن کے خاندان کے افراد سے کروائی گئی۔

شاعر احمد فرہاد کو اقدام قتل اور انسداد دہشت گردی کی دفعات کے تحت درج ایک مقدمے میں مظفر آباد پولیس کی تحویل میں ہیں۔

ابتدائی اطلاعات کے مطابق احمد فرہاد کی ملاقات اُن کی اہلیہ، بیٹی اور بھائی سے کروائی گئی ہے۔ اس بارے میں احمد فرہاد کی وکیل ایمان مزاری نے بھی اُن کی فیملی سے ملاقات کی تصدیق کی ہے۔

اسلام آباد سے 17 مئی کو لاپتہ ہونے والے شاعر احمد فرہاد کے خلاف آزاد کشمیر میں کار سرکار میں مداخلت کا مقدمہ 29 مئی کو ہی درج کیا گیا تھا جس کے بارے میں گزشتہ روز 29 مئی کو اسلام آباد ہائیکورٹ کو احمد فرہاد کی اہلیہ کی جانب سے ان کی گمشدگی کے خلاف درخواست کی سماعت کے دوران آگاہ کیا گیا تھا۔ عدالت نے احمد فرہاد کی وکیل ایمان مزاری کو آزاد کشمیر میں حکام سے رابطہ کرنے کی ہدایت کی تھی۔

ایمان مزاری نے بتایا کہ انھیں احمد فرہاد کی اہلیہ اور اُن کے بھائی نے بتایا ہے کہ گزشتہ شب اُن کی ملاقات احمد فرہاد سے کروائی گئی۔

خیال رہے کہ احمد فرہاد کے خلاف آزاد کشمیر کے علاقے کوہالہ میں مقدمہ درج کیا گیا تھا جس کے مطابق احمد فرہاد نے کوہالہ پل پر تفتیش کے دوران پولیس سے تلخ کلامی اور بدتمیزی کی جس کے بعد ان کو گرفتار کر لیا گیا تھا۔ باغ پولیس کی مدعیت میں درج اس مقدمے میں دعویٰ کیا گیا ہے کہ فرہاد علی شاہ نے کار سرکار میں مزاحم ہو کر جرم کا ارتکاب کیا ہے۔

یاد رہے احمد فرہاد کی گمشدگی کا معاملہ سامنے آنے پر شاعر احمد فرہاد کی اہلیہ عین نقوی نے بتایا تھا کہ پآزاد کشمیر میں ایک ہفتہ قبل بجلی اور اّٹے کی قیمتوں کے معاملے پر ان کے شوہر نے ذمہ داران کو سخت تنقید کا نشانہ بنایا تھا اور اس کے بعد 17 مئی کو ان کے شوہر کسی کام کے سلسلے میں باہر گئے ہوئے تھے اور جب وہ گھر لوٹے اور گھنٹی بجائی تو اتنے میں کچھ نامعلوم افراد وہاں پہنچ گئے اور احمد فرہاد کو زبردستی اٹھا کر لے گئے۔

عین نقوی کے مطابق ان کے شوہر کو گذشتہ دو سالوں سے سنگین نتائج کی دھمکیاں مل رہی تھیں اور انھیں کہا جا رہا تھا کہ وہ ملٹری اسٹیبلشمنٹ کے مفادات کے خلاف لکھنا چھوڑ دیں ورنہ ان کے حق میں بہتر نہیں ہوگا۔

یاد رہے کہ احمد فرہاد کی گمشدگی کے بعد ان کی اہلیہ کی جانب سے ان کی بازیابی سے متعلق دائر کردہ درخواست پر گذشتہ ہفتے ہونے والی سماعت کے دوران اسلام آباد ہائیکورٹ نے سیکٹر کمانڈر اسلام کے علاوہ آئی ایس آئی اور ایم آئی کے نمائندوں کو بھی بدھ ہونے والی سماعت میں پیش ہونے کے احکامات دیے تھے۔ تاہم سماعت میں آئی جی اسلام آباد پیش ہوئے اور عدالت کو آگاہ کیا احمد فرہاد کو باغ پولیس نے حراست میں لے لیا ہے۔