حاجی رانا ثناء اللّٰہ کی دعاؤں سے آئی ایم ایف کے امتحان سے نکلے ، وزیراعظم شہباز شریف

اسلام آباد میں شاہین چوک فلائی اوور کا سنگ بنیاد رکھنے کی تقریب سے خطاب کرتے ہوئے وزیراعظم شہباز شریف کا کہنا تھا آئی ایم ایف پروگرام ہمارے لیے حلوہ نہیں بلکہ بہت سخت پروگرام ہے۔

ان کا کہنا تھا ہماری اجتماعی کاوشوں کی بدولت آج ریاست بچ گئی، ہم نے مجبوراً آئی ایم ایف پروگرام کو قبول کیا، ہم نے سیاست کو داؤ پر لگایا اور ریاست کو بچایا۔

وزیراعظم شہباز شریف کا کہنا تھا حاجی ثنا اللہ سمیت لاکھوں پاکستانیوں کی دعاؤں سے پاکستان آئی ایم ایف کے امتحان سے نکل آیا ہے، امید ہے کہ آج آئی ایم ایف کا بورڈ پاکستان کے پروگرام کی منظوری دے دیگا۔

شہباز شریف کا کہنا تھا پاکستان کی معاشی بحالی کا پروگرام تیار کیا جا رہا ہے، مسلح افواج بھی معاشی بحالی کے پروگرام میں شریک ہیں۔

ان کا کہنا تھا چیئرمین پی ٹی آئی کو اسٹیبلشمنٹ نے دھاندلی زدہ الیکشن سے اقتدار پر بٹھایا، چیئرمین پی ٹی آئی نے چیئرمین پاکستان تحریک انصاف پاکستان دشمنی پر اترے ہوئے ہیں، 4 سالوں میں معیشت کا بیڑا غرق کرنے کے لیے ملک دشمنی کی، چار سال دوسروں کو چور ڈاکو کہنے والے نے خانہ کعبہ کے ماڈل والی گھڑی جیب میں رکھ لی، 190 ملین پاؤنڈ کا اسکینڈل بھی سب کے سامنے ہے۔

وزیراعظم کا کہنا تھا چیئرمین پی ٹی آئی کے حق میں اسرائیل نے بیان دیا، فلسطینیوں پر ظلم کے پہاڑ توڑنے والا اسرائیل کہتا ہے پاکستان میں ظلم ہو رہا ہے۔