پاکستان کے صوبہ خیبرپختونخوا کی تحصیل لنڈی کوتل میں 1914 سے مقیم اقلیتی مسیحی آبادی کو پہلی بار کیٹگری اے کے ڈومیسائل جاری کر دیے گئے۔
یہ آبادی یہاں گذشتہ ایک صدی سے زائد عرصے سے مقیم ہے لیکن اس دوران یہ کسی اور علاقے کے رہائشی سمجھے جاتے رہے۔
ضلعی انتظامیہ کی جانب سے درجہ اول کے ڈومیسائل جاری کیے جانے کے بعد مقامی مسیحی آبادی خوش ہے ۔
مسیحی آبادی نے مقامی میڈیا سے بات کرتے ہوئے بتایا کہ پہلا درجہ اول ڈومیسائل حاصل کرنے والے ارشد مسیح کا کہنا ہے کہ ضلعی انتظامیہ اور حکومت نے ہمیں پہلی بار یہاں کے مستقل رہائشی تسلیم کیا ہے جس پر مسیحی برادری خوش ہے۔
مسیحی برادری کی اقلیتی کونسل کے چیئرمین ارشد کے مطابق ’درجہ اول کے ڈومیسائل سرٹیفیکیٹ بڑی اہمیت کا حامل ہے۔ ہم اس ڈومیسائل کی بدولت اب یہاں کی دیگر برادری کی طرح اس علاقے کے برابر شہری بن چکے ہیں۔ کیٹگری بی ڈومیسائل سرٹیفیکیٹ سے ہم یہاں اپنے آپ کو مہاجر سمجھتے تھے۔ حالانکہ ہم بھی اپنے مسلمان ہمسایوں کی طرح 1914 سے لنڈی کوتل میں آباد تھے۔‘
ان کا کہنا ہے کہ ’کیٹگری بی کے ڈومیسائل پر ٹرائبل ڈسٹرکٹ کی بجائے اقلیتی ڈومیسائل لکھا ہوتا تھا جس سے کرسچن کمیونٹی یہاں کے درجہ دوم کے شہری تصور ہوتے تھے جس پر کرسچن کمیونٹی میں احساس محرومی اور دوسرے علاقے سے آئے تصور کئے جاتے تھے۔
