آج کل معاشرے میں الیکٹرانک گیمز نے بچوں کو پوری طرح جکڑا ہوا ہے، جس کے باعث ان کی تعلیم اور فزیکل کی سرگرمیاں تباہ ہو کر رہ گئی ہیں، بچوں کے والدین بھی اس بات کو لے کر پریشانی میں مبتلا ہیں کہ ان کے بچے ہر وقت گیمز کھیلتے رہتے ہیں۔
تحقیق سے پتہ چلتا ہے کہ کچھ ڈیجیٹل گیمز بچوں کی صحت پر مثبت اثرات مرتب کرتے ہیں جبکہ بعض گیمز ایسے بھی ہیں جو بچوں کی صحت پر منفی اثرات مرتب کرتے ہیں۔
ایک رپورٹ میں بعض ایسے نکات پیش کیے گئے ہیں جن پر توجہ دینے سے بچوں کو ڈیجیٹل گیمز کے خطرے سے دور رکھا جا سکتا ہے۔
الیکٹرانک گیمز کے نقصانات
1۔ موٹاپا اور جسمانی پٹھوں اور نگاہ کمزور ہوجانا
2۔ غصہ بڑھ جانا اور ذہنی دباؤ میں اضافہ
3۔ تعلیم سے دوری اختیار کرجانا
4۔ صرف اپنے آپ میں مگن ہوجاتا اور دوسروں سے کٹ کر رہ جانا
ماہرین کا کہنا ہے کہ بچوں کو مرحلہ وار غیر محسوس انداز میں الیکٹرانک گیم سے دور کریں۔ بچوں کو الیکٹرانک گیمز کے عادی ہونے سے بچانے کے لیے ماہرین نے متعدد تجاویز پیش کی ہیں جن میں سے چند پیش کی جارہی ہیں۔
گیمز کا متبادل پیش کریں
بہتر ہے کہ بچوں کو دیگر مفید سرگرمیوں میں حصہ لینے دیں۔ اس حوالے سے انہیں جسمانی سپورٹس کی جانب راغب کریں، ہو سکے تو کسی کھیل کے کلب میں ان کا داخلہ کرا دیں علاوہ ازیں انہیں کتابیں پڑھنے کے لیے دیں تاکہ مثبت سرگرمیوں میں انہیں مصروف رکھا جا سکے۔
حقیقی دوستی کے رجحان کو فروغ دیں
نئی دوستیاں بنانے کے لیے بچے کو مختلف سپورٹس یا تعلیمی کلب میں داخل کرائیں تاکہ وہ الیکٹرانک گیمز کی جانب راغب نہ ہوں۔ اس میں کوئی شک نہیں کہ الیکٹرانک گیمز کھیلنے سے بچوں کو باز رکھنا اگرچہ مشکل امر ہے تاہم یہ ناممکن نہیں۔ اس رجحان کو کنٹرول کرنے کے لیے سماجی خلا کو پُر کرنے کی ضرورت ہے اور روابط کو مستحکم کریں تاکہ بچے نئے دوست بنائیں۔
وقت کو منظم کریں
بچوں کو اس بات کا احساس دلائیں کہ وہ اپنے وقت کو منظم کریں اور ہر کام اپنے وقت پر کریں۔ پڑھائی کے وقت پڑھائی کریں اور جسمانی کھیلوں میں حصہ لینے کا وقت بھی متعین کریں۔ ایسا کرنے سے ان میں احساس ذمہ داری میں اضافہ ہو گا اور وہ کسی مشکل میں مبتلا نہ ہوں گے کیونکہ جو عادت انہیں ابتدا سے ہو گی وہ ہمیشہ اسی پر قائم رہیں گے۔
بچوں سے بات کریں
والدین کو چاہیے کہ وہ بچوں کو ان گیمز کے خطرناک اثرات سے اچھی طرح واقف کرائیں اور انہیں اس بات کا یقین دلائیں کہ مسلسل گیم کھیلنا ان کے لیے نقصان دے ہوسکتا ہے۔
محدود وقت کا تعین کریں
والدین اپنے بچوں کو کمپیوٹر یا آئی پیڈ استعمال کرنے کے لیے دن میں ایک گھنٹہ متعین کریں جو صرف پڑھائی کی حد تک ہو۔ کمپیوٹر میں بچوں کی حفاظت کے پروگرام انسٹال کریں۔
ڈیجیٹل آلات سے دوری
اگر آپ کا بچہ ایک بکس یا پلے اسٹیشن استعمال کرتا ہے تو اس بات کو یقینی بنائیں کہ یہ آلات ہمہ وقت اس کی دسترس میں نہ ہوں۔ آپ بچوں کو دن میں زیادہ سے زیادہ دو گھنٹے کے لیے کھیلنے کی اجازت دے سکتے ہیں، وہ بھی چھٹیوں یا ویک اینڈز پر اس کی علاوہ نہیں۔
