2 ستمبر 1965 وہ تاریخی دن ہے جب پاکستان اور بھارت کے درمیان چھڑنے والی جنگ کا دوسرا روز تھا، جب بھارتی وزیر اعظم لال بہادر شاستری نے پاکستان کو جنگ کی دھمکی دی مگر ساتھ ہی اعتراف کیا کہ گزشتہ روز پاکستانی افواج نے 4 بھارتی طیاروں کو مار گرایا، جس پر صدر ایوب خان نے جواب دیا کہ جارحیت کا بھرپور جواب دیا جائے گا جب کہ پاکستان کشمیریوں سے اپنا وعدہ پورا کرے گا۔
بھارتی آرمی چیف جنرل جے این چوہدری نے بھارتی مقبوضہ کشمیر میں اعلیٰ فوجی افسران سے ملاقات بھی کی، دوسری جانب صدر ایوب نے پاکستانی قوم سے خطاب میں بھارت کو تنبیہہ کی کہ بھارت نے ابتدا ہی سے پاکستان اور کشمیر کے متعلق اپنی پالیسی کی بنیاد نفرت اور دشمنی پر رکھی ہے، جس کے نتیجے میں سنگین صورت حال پیدا ہوگی، جارحیت کا بھرپور جواب دیا جائے گا، اور پاکستان کشمیریوں سے اپنا وعدہ پورا کرے گا۔
سردار عبدالقیوم نے بھارت کو خبردار کیا کہ بھارتی افواج اپنی قبر میں اْترآئی ہے، بین الاقوامی مبصرین نے بھارت کی طرف سے فضائی قوت استعمال کرنے پر نہایت افسوس کا اظہار کیا، جی ایچ کیو نے تمام فارمیشنز کو وارننگ آرڈر جاری کر دیے کہ بھارتی افواج کی بڑھتی ہوئی جنگی تیاریوں کے پیشِ نظر وہ 2 ستمبر کی صبح تک کنسنٹریشن (concentration) ایریاز سنبھال لیں۔
کشمیر کے محاذ پر پاک فوج نے بھارتی مقبوضہ کشمیر کے علاقے سونا مرگ کے نزدیک ایک بھارتی پلاٹون کا مکمل صفایا کرتے ہوئے بھارتی افواج کے ٹھکانوں اور تنصیبات پر حملے جاری رکھے، پاکستانی افواج نے چھمب میں مشرق کی جانب پیش قدمی کرتے ہوئے 15 ٹینک قبضے میں لیے اور 150 بھارتی فوجیوں کو جنگی قیدی بنا لیا۔
