*راوی کپ ایشین جونیئر ٹینس میں محمد فیضان اور مصطفیٰ عزیر رانا نے کامیابیاں سمیٹ لیں*
لاہور: اسپورٹس بورڈ پنجاب ٹینس اکیڈمی، نشتر پارک اسپورٹس کمپلیکس میں جاری "راوی کپ اے ٹی ایف ایشین جونیئر ٹور انڈر 12 (2026)” میں بدھ کے روز جونیئر ٹینس کے دلچسپ اور سنسنی خیز مقابلے دیکھنے میں آئے۔
ایونٹ کے تیسرے روز لڑکوں اور لڑکیوں کے انڈر 12 سنگلز راؤنڈ روبن مقابلوں کے ساتھ ساتھ بوائز اور گرلز ڈبلز ایونٹس کے کوارٹر فائنل میچز کھیلے گئے۔
لڑکوں کے سنگلز مقابلوں میں محمد فیضان نے ایم ابراہیم حسین گل کو ایک سخت مقابلے کے بعد 6-3، 6-7 اور 10-5 سے شکست دی۔ محمد ایان نے محمد دانیال کے خلاف 6-3 اور 6-3 سے فتح حاصل کی، جبکہ مصطفیٰ عزیر رانا نے شاندار کھیل کا مظاہرہ کرتے ہوئے ولی ایم حسان کو 6-0 اور 6-0 سے آؤٹ کلاس کیا۔ دیگر میچز میں ابراہیم لغاری نے فہد مصطفیٰ کو 6-2 اور 6-4 سے ہرایا، جبکہ دانیال عبداللہ نے ریان عمر خلیل کے خلاف 6-0 اور 6-0 سے یکطرفہ کامیابی حاصل کی۔
لڑکیوں کے سنگلز مقابلوں میں ایمان منو نے رحیمین جاذب کو 6-2 اور 6-4 سے شکست دی، جبکہ شاہ نور عمر نے وجیہہ فاطمہ کو 6-0 اور 6-1 سے ہرایا۔ شاہ رین عمر اور دعا قریشی نے بھی بالترتیب نوریہ اویس اور ام ایمن کے خلاف اپنے میچز براہ راست سیٹس (Straight Sets) میں جیتے۔
بوائز ڈبلز کے کوارٹر فائنلز میں ایم ابراہیم حسین گل/محمد ایان، مصطفیٰ عزیر رانا/دانیال عبداللہ، بہروز مہمون وینڈر/ماجد علی بچانی اور علی بخاری/حاشر مصطفیٰ کی جوڑیوں نے کامیابی حاصل کر کے اگلے مرحلے کے لیے کوالیفائی کر لیا۔ گرلز ڈبلز میں ایمان شہباز/دعا قریشی اور وجیہہ فاطمہ/ام ایمن کی جوڑیاں اگلے راؤنڈ میں پہنچنے میں کامیاب رہیں۔
