اسلام آباد: خیبرپختونخوا میں پاکستان تحریک انصاف کی حکومت اور وزیراعلیٰ سہیل آفریدی کے مستقبل سے متعلق اہم دعویٰ سامنے آیا ہے۔
ایک نجی ٹی وی چینل کے پروگرام میں ذرائع کے حوالے سے دعویٰ کیا گیا ہے کہ فیصلہ سازوں کے لیے اب صرف پی ٹی آئی کا لانگ مارچ مسئلہ نہیں رہا بلکہ معاملہ وزیراعلیٰ سہیل آفریدی کی حکومت تک پہنچ چکا ہے۔
ذرائع کے مطابق مسئلہ اب لانگ مارچ سے آگے بڑھ گیا ہے اور اسے قومی سلامتی سے جوڑا جا رہا ہے۔ ذرائع کا دعویٰ ہے کہ اسی تناظر میں سہیل آفریدی کی حکومت کے مستقبل کے حوالے سے اہم فیصلہ کیا جا چکا ہے۔
دوسری جانب پروگرام میں بتایا گیا کہ پی ٹی آئی کے اہم ذرائع نے لانگ مارچ مؤخر کیے جانے کی تصدیق کی ہے، تاہم اس کی وجہ تیاری میں کمی قرار دینے کو مسترد کیا ہے۔
پی ٹی آئی ذرائع کے مطابق لانگ مارچ کی تیاری مکمل ہے، عوام متحرک ہیں اور کارکن احتجاج کے لیے تیار ہیں، تاہم پارٹی کی حکمت عملی حکومت کو مسلسل دباؤ میں رکھنے کی ہے۔ ذرائع نے اس حکمت عملی کو ’’ٹیسٹ میچ‘‘ سے تشبیہ دیتے ہوئے کہا کہ حکومت کو تھکانے کی کوشش کی جائے گی۔
ذرائع کے مطابق 5 اکتوبر عمران خان کی سالگرہ بھی ہے، جس کے باعث اس تاریخ کی سیاسی اور علامتی اہمیت بھی موجود ہے۔
تاہم دوسری جانب باخبر ذرائع کا دعویٰ ہے کہ حکومت اور فیصلہ سازوں کی سوچ اس معاملے میں مختلف ہے۔ ذرائع کے مطابق پی ٹی آئی لانگ مارچ کرے یا اسے مؤخر کرے، اب اصل معاملہ لانگ مارچ نہیں بلکہ قومی سلامتی بن چکا ہے۔
ذرائع نے دعویٰ کیا کہ سہیل آفریدی اور ان کے ساتھیوں پر دہشت گرد عناصر سے روابط اور ملک کو کمزور کرنے کے الزامات کے تناظر میں خیبرپختونخوا حکومت کے مستقبل پر غور کیا جا رہا ہے، جبکہ اسی صورتحال کو صوبے میں بڑھتی ہوئی دہشت گردی سے بھی جوڑا جا رہا ہے۔
ذرائع کا مزید کہنا ہے کہ اسی بنیاد پر سہیل آفریدی کی حکومت کے خاتمے کا فیصلہ کر لیا گیا ہے۔
تاہم ان تمام دعوؤں کی آزاد ذرائع سے تصدیق نہیں ہو سکی۔
**نوٹ:** اس خبر میں بیان کردہ دعوے **جیو نیوز** کے پروگرام ’’نیا پاکستان‘‘ میں ذرائع کے حوالے سے سامنے آئے ہیں؛ خبر میں موجود الزامات اور دعوے متعلقہ ذرائع سے منسوب ہیں۔
