بنگلا دیشی محکمہ موسمیات کے مطابق جمعہ کی صبح 5.7 شدت کا زلزلہ آیا تھا، زلزلے کے جھٹکےتقریباً 26 سیکنڈ تک رہے، لوگ خوف کے باعث گھروں سے باہر نکل آئے۔
جرمن ریسرچ سینٹر کے مطابق زلزلے کا مرکزڈھاکا سے قریب نرسنگدی شہر تھا ۔ زلزلے کی گہرائی 10کلو میٹر تھی جبکہ زلزلے کے جھٹکے بھارتی شہر کولکتا اور شمال مشرقی بھارت کے کچھ حصوں میں بھی محسوس کیے گئے۔
خبر رساں ایجنسی کے مطابق زلزلے کے نتیجے میں5 افراد ہلاک، 100 زخمی ہوگئے ہیں۔ زلزلے سے کئی علاقوں میں عمارتوں کو نقصان پہنچا۔
بنگلا دیش کی عبوری حکومت کے سربراہ محمد یونس نے زلزلے سے ہلاکتوں پر گہرے صدمے اور افسوس کا اظہا کیا۔
محمد یونس نے بتایا کہ زخمیوں میں ڈھاکا یونیورسٹی کے طلبہ، گازی پور کے فیکٹری ورکرز اور نرسنگدی کے رہائشی شامل ہیں۔
