آئین و قانون میں رہ کر کام کر رہے ہیں تاکہ نظریاتی و جغرافیائی سرحدیں قائم رہیں، جسٹس محسن اختر کیانی

اسلام آباد ہائیکورٹ کے جسٹس محسن اختر کیانی نے کہا ہے کہ ہماری جنگ آج بھی جاری ہے، آئین و قانون میں رہ کر کام کر رہے ہیں تاکہ نظریاتی و جغرافیائی سرحدیں قائم رہیں۔

اسلام آباد ہائیکورٹ میں یومِ آزادی پر پرچم کشائی کی تقریب ہوئی جس میں جسٹس میاں گل حسن اورنگزیب اور جسٹس ارباب محمد طاہر بھی شریک ہوئے۔

تقریب سے خطاب کرتے ہوئے جسٹس محسن اختر کیانی نے کہا کہ اس ملک کیلئے ہمارے آباؤ اجداد نے بہت قربانیاں دیں، ہمیں ان قربانیوں کا شاید احساس نہیں کیونکہ ہم اس وقت موجود نہیں تھے۔

جسٹس محسن اختر کیانی نے کہا کہ شہدا کو یاد رکھنا ضروری ہے، شہدا نے ملک بنتے وقت اور اب تک جانوں کا نذرانہ پیش کر رہے ہیں۔

انہوں نے کہا کہ ایک ایک پودا ضرور لگائیں تاکہ آنے والی نسلیں جان سکیں کہ ان کے لیے کسی نے کچھ کیا ہے، اپنے بزرگوں اور بچوں سے پودے لگوائیں تاکہ وہ نشانی کے طور پر رہیں۔