دہشت گردوں کے لیے مخصوص سیل میں بنیادی انسانی حقوق سے محروم رکھا گیا ہے، عمران خان کا برطانوی جریدے کو انٹرویو

توشہ خانہ کیس میں قید پاکستان تحریک انصاف(پی ٹی آئی) کے بانی اور سابق وزیر اعظم عمران خان نے کہا ہے کہ انہیں دہشت گردوں کے لیے مخصوص سیل میں بنیادی انسانی حقوق سے محروم رکھا گیا ہے۔

برطانوی جریدے ’دی سنڈے ٹائمز‘ کو انٹرویو دیتے ہوئے عمران خان نے کہاکہ میں 7 فٹ بائی 8 فٹ ڈیتھ سیل میں قید ہوں جو عام طور پر دہشت گردوں کے لیے مخصوص ہوتا ہے تاکہ اس بات کو یقینی بنایا جا سکے کہ ان کا کسی سے کوئی رابطہ نہ رہے۔

انہوں نے کہا کہ یہ قید تنہائی ہے جس میں چلنے پھرنے کے لیے بمشکل ہی کوئی جگہ ہے، میں ایجنسیوں کی مسلسل نگرانی میں ہوں، 24/7 میری ریکارڈنگ کی جاتی ہے اور لوگوں سے ملاقات سمیت مجھے قیدیوں کو میسر بنیادی انسانی حقوق سے بھی محروم رکھا گیا ہے۔

ان کا کہنا تھا کہ مارشل لا کے ماحول میں منعقد ہونے والے الیکشن میں انتخابی نتائج اور ووٹرز کا ٹرن آؤٹ کسی انقلاب سے کم نہیں تھا، لوگوں نے مجھے اس لیے ووٹ دیا کیونکہ وہ موجودہ نظام سے تنگ آچکے ہیں۔

عمران خان نے مزید کہا کہ یہ کھیل مجھے اور میری پارٹی کو توڑنے کے لیے کھیلا جا رہا ہے لیکن اللہ تعالیٰ کے فضل و کرم سے نہ کوئی کامیاب ہوا اور نہ ہی ہوگا۔

برطانوی جریدے کے مطابق عمران خان کا یہ انٹرویو ان کے وکلا کے ذریعے کیا گیا کیونکہ جیل میں ان کو کاغذ اور قلم کی سہولت میسر نہیں ہے۔