گورنر سندھ کامران ٹیسوری نے عیدالفطر کے موقع پر بھی خواتین کے لیے مہندی لگانے اور ان میں چوڑیاں تقسیم کرنے کا اہتمام کیا تھا اور اب عیدالاضحیٰ کے موقع پر انہوں نے بکرے تقسیم کرنے کا اعلان کیا ہے۔
کامران ٹیسوری کی جانب سے ویڈیو بیان میں کہا گیا ہے کہ کراچی میں ہر قوم اور ہر زبان کا بولنے والا رہتا ہے اور ایسے بہت سے خاندان ہوں گے جن کے والدین یا والد کسی حادثے میں شہید ہو گئے یا گولی مار دی گئی، تو ان کے گھر عید پر بکرے کون لائے گا۔
گورنر سندھ کا کہنا تھا آج میں اعلان کر رہا ہوں کہ ایسے تمام افراد جن کے گھر کا بڑا کسی حادثے میں شہید ہو گیا یا اسے گولی مار دی گئی تو وہ آئیں اور اپنا نام لکھوائیں ہم انہیں ایک ایک بکرا ضرور دیں گے۔
ان کا کہنا تھا جن لوگوں کے والد یا والدین اس دنیا سے چلے گئے ہم ان کی کمی تو پوری نہیں کر سکتے لیکن کسی حد تک عید کی خوشیاں منانے میں ان کا ساتھ تو دے سکتے ہیں۔
کامران ٹیسوری کا کہنا تھا موجودہ معاشی صورتحال میں متوسط طبقے کی بھی کمر ٹوٹ چکی ہے لہذا ہم غریب خاندانوں کے ساتھ متوسط طبقے سے تعلق رکھنے والے افراد کو بھی اکیلا نہیں چھوڑیں گے اور 20 ہزار خاندانوں میں راشن تقسیم کریں گے
