سابق وفاقی وزیر فیصل واوڈا نے کہا ہے کہ وہ اگلا الیکشن آزاد امیدوار کی حیثیت سے لڑیں گے، دو بچے اپنے والدین سے فرمائش کررہے ہیں کہ انہیں وزیراعظم بنا دیں، پردے کے پیچھے بہت کچھ ہورہا ہے شاید قوم کو نہیں پتہ، نتائج کا انتظار کریں۔
نجی ٹی وی چینل سے گفتگو کرتے ہوئے انہوں نے کہا کہ اگلے وزیراعظم کے بننے میں زیادہ ہاتھ آزاد ارکان اور ٹولوں کا ہوگا۔ دھڑوں میں گروپوں میں نئی پارٹیوں میں تقسیم ہوجائے گی، انتخابات وقت پر نہیں ہوں گے مگر ہوجائیں گے۔ چیئرمین پی ٹی آئی بیلٹ کے اندر اور الیکشن کا حصہ نہیں ہوں گے اور نہ پی ٹی آئی ہوگی۔
پی ٹی آئی کے سابق رہنما نے کہا کہ ‘میں کسی ذمہ داری کے تحت بہت زیادہ چیزیں نہیں کھول سکتا۔ میں آپ جیسے لوگوں کے سامنے اپنی آواز اٹھاؤں گا، سب کچھ بتاؤں گا۔ چاہے وہ ارشد شریف کا قتل ہو اس میں جو جو لوگ ملوث ہوں۔ یہ پورا گیم رچانے میں کیا ہوا کرپشن میں کیا ہوا پاکستان کی بنیادیں ہلانے میں کیا ہوا سب بتاؤں گا۔
فیصل واوڈا نے مزید کہا کہ پردے کے پیچھے بہت کچھ ہورہا ہے، شاید قوم کو نہیں پتہ، اس کے نتائج کا انتظار کریں، نہیں ہوا تو پھر ہم جیسے آگے آجائیں گے۔ ہم تو خودکش بمبار ہیں، پاکستانی قوم کے سامنے سارا تماشہ کھول دیں گے۔
