سابق فاسٹ بولر شعیب اختر نے کہا ہے پی سی بی میں چیئرمین کے سوا کسی عہدے پر کام کرنے کیلیے تیار نہیں۔ انہوں نے ایک نجی ٹی وی کو انٹرویو میں کہا کہ میں نے ہمیشہ ٹاپ پر رہنے کا خواب دیکھا ہے،بورڈ میں بھی کسی عہدے پر کام کیا تو وہ چیئرمین کا ہوگا،اگر میرا پالیسی بنانے میں کوئی کردار نہیں تو کسی بھی پوزیشن پر کام کرنے کا کوئی جواز نہیں بنتا۔
انہوں نے کہا اگر میں چیئرمین ہوا تو اپنے سے بہتر ٹیم لاؤں گا، بہتر چیف ایگزیکٹیو کا انتخاب کروں گا، پی سی بی کو ایک کارپوریشن کی طرح چلاؤں گا، دنیا معیشت پر چلتی ہے، اسی انداز کا سسٹم لائیں تو معاملات آگے بڑھائے جا سکیں گے۔ پاکستان کے پاس اچھے آل راؤنڈرز اور اسپنرز ہیں،البتہ مڈل آرڈر میں مسائل ہیں،مجھے یقین ہے کہ گرین شرٹس بھارت کو شکست دینے کے ساتھ ٹی ٹوئنٹی ورلڈکپ بھی جیت سکتے ہیں۔
