سابق صدر آصف علی زرداری نے چیئرمین پی ٹی آئی عمران خان کے حوالے سے کہا ہےکہ ایک شخص فوج ، پولیس اور خاتون مجسٹریٹ کو دھمکیاں دیتا ہے اور کہتا ہے مجھے گرفتار کرکے دکھاؤ تو عدلیہ کو دیکھنا ہوگا کہ کیا یہ شخص قانون سے بالاتر ہے
ترجمان بلاول ہاؤس کا بتانا ہے کہ سابق صدر آصف زرداری سے سندھ کے وزرا نے ملاقات کی جس میں صوبے میں بارشوں کی صورتحال پر غور کیا گیا۔آصف زرداری نے کہا کہ چاروں صوبوں میں بارشوں کے باعث ہنگامی صورتحال کا سامنا ہے اور متاثرین کی نگاہیں ہماری طرف لگی ہیں ، سب کو سیاست چھوڑ کر صرف متاثرین کی طرف توجہ دینی چاہیے۔
سابق صدر نے کہا کہ ملک میں ایک شخص کا دن بہ دن اقتدار کا نشہ اسے پاگل کر رہا ہے ، یہ شخص ہر روز ہماری فوج پر تنقید کر رہا ہے ، فوجی افسران اور سپاہی دہشت گردوں سے جنگ لڑ رہے ہیں جس میں وہ اپنی جانوں کے نذرانے پیش کر رہے ہیں ۔ فوج ، پولیس اور خاتون مجسٹریٹ کو یہ شخص دھمکیاں دیتا ہے ، یہ شخص کہتا ہے مجھے گرفتار کرکے دکھاؤ ، عدلیہ کو دیکھنا ہوگا کہ کیا یہ شخص قانون سے بالاتر ہے۔
سابق صدر کا کہنا تھا کہ یہ شخص میرے ، نواز شریف اور مریم بیٹی کے خلاف انتقامی کارروائیاں کر سکتا ہے، یہ شخص کیا خود ہر قانون کو روند سکتا ہے ؟ اداروں اور حکومت کو اپنی رٹ قائم کرنی پڑے گی
