ایجبسٹن ٹیسٹ کے ہیرو رضا اللہ نے کہا ہے کہ یہ تاثر غلط ہے کہ میرے پاس پاسپورٹ ہی نہیں تھا۔
برمنگھم کے ایجبسٹن کرکٹ گراؤنڈ پر تیسرے ٹیسٹ کے تیسرے دن انگلینڈ کے خلاف نویں نمبر پر 63 گیندوں پر 4 چوکوں اور 9 چھکوں کیساتھ طوفانی 81 رنز کی اننگز کھیلنے والے دائیں ہاتھ کے جارح مزاج بلے باز رضااللہ کہتے ہیں کہ اس بات میں کوئی صداقت نہیں کہ ان کا پاسپورٹ نہیں بنا ہوا تھا اور جب انھیں انگلینڈ طلب کیا گیا تو بورڈ نے ہنگا می بنیادوں پر ان کا پاسپورٹ بنوایا۔
اپر دیر میں پیدا ہونیوالے نوجوان فاسٹ بولر جو قائد اعظم ٹرافی پشاور ریجن کیلئے کھیلے، ان کا کہنا تھا کہ ایک سال قبل ان کا پاسپورٹ بن گیا تھا اور وہ جاپان میں ہونیوالے ایشین گیمز کی تیاری کر رہے تھے، جب انھیں لاہور میں واقع پی سی بی کے ہائی پرفارمنس سینٹر میں بتایا گیا کہ وہ انگلینڈ جا رہے ہیں۔
رضا اللہ کا کہنا تھا کہ ماں باپ کی دعاؤں کا نتیجہ ہے کہ آج مجھے پاکستان کی نمائندگی کا موقع ملا اور وہ اللہ تعالی کا شکر ادا کرتے ہیں کہ دوسری اننگز میں انگلینڈ کے بولرز کے خلاف رنز بنانے میں کامیاب رہے۔
انہوں نے کہاکہ وہ فرسٹ کلاس کرکٹ میں اننگز اوپن بھی کر چکے ہیں۔
21 سال کے دائیں ہاتھ کے تیز بولر کا کہنا تھا کہ انھیں انگلش بولرز کو اٹیک کر کے بلے باز ی کر نے میں لطف آیا، جب ان سے سوال ہوا کہ انھوں نے کوچ سے اوپری نمبروں پر بیٹنگ میں جانے کے لئے کہا تو مسکراتے ہوئے رضا اللہ بولے یہ میرا پہلا ٹیسٹ ہے، میں ایسا کیسے کر سکتا تھا لیکن اب اعتماد ملا ہے اور کوچ نے مجھے بیٹنگ کرتے دیکھا بھی ہے، مستقبل میں ضرور ایسا سوچوں گا اور ضرورت محسوس ہوئی تو کوچ سے بات بھی کروں گا۔
