وفاقی حکومت نے میجر جنرل فیصل نصیر کو نیشنل کاؤنٹر ٹیررازم اتھارٹی (نیکٹا) کا نیشنل کوآرڈینیٹر مقرر کر دیا ہے۔ سرکاری نوٹیفکیشن کے مطابق ان کی تعیناتی تین سال کے لیے ہوگی اور فوری طور پر نافذ العمل ہے۔
میجر جنرل فیصل نصیر اس سے قبل آئی ایس آئی کے انٹرنل ونگ، المعروف ’ڈی جی سی‘، کے سربراہ رہ چکے ہیں۔ 2022 میں میجر جنرل کے عہدے پر ترقی کے بعد انہیں آئی ایس آئی میں تعینات کیا گیا۔
ان کے فوجی کیریئر کا بڑا حصہ انٹیلیجنس، انسدادِ دہشت گردی اور کاؤنٹر انٹیلیجنس سے متعلق ذمہ داریوں میں گزرا۔ وہ بلوچستان میں بھی اہم ذمہ داریاں انجام دے چکے ہیں اور مختلف فوجی اعزازات حاصل کر چکے ہیں۔
فیصل نصیر کا نام 2022 میں عمران خان پر ہونے والے قاتلانہ حملے کے بعد قومی سطح پر نمایاں ہوا، جب عمران خان نے ان پر حملے میں ملوث ہونے کا الزام عائد کیا تھا۔ پاک فوج نے اس الزام کو بے بنیاد قرار دیا تھا۔
نیکٹا میں نئی ذمہ داری کے تحت فیصل نصیر کو دہشت گردی اور انتہا پسندی کے خلاف قومی حکمتِ عملی، اداروں کے درمیان رابطہ کاری اور قومی سطح پر انسدادِ دہشت گردی کے اقدامات میں اہم کردار ادا کرنا ہوگا۔
