*آئی ٹی ایف ماسٹرز ٹینس: عمران بھٹی، رشید ملک اور بریگیڈیئر غضنفر کی فاتحانہ پیش قدمی*
لاہور: پنجاب ٹینس اکیڈمی، باغ جناح لاہور میں ایک پروقار تقریب کے ساتھ ‘آر ایل کے گروپ آئی ٹی ایف ماسٹرز ٹینس چیمپئن شپ 2026 (MT200) کا باقاعدہ افتتاح کر دیا گیا، جو کہ سینئرز ٹینس کے ایک سنسنی خیز بین الاقوامی ایونٹ کا آغاز ہے۔
اس چیمپئن شپ میں دنیا بھر سے بڑی تعداد میں تجربہ کار کھلاڑی شرکت کر رہے ہیں جو مختلف عمر کے زمروں میں ٹائٹل کے حصول کے لیے مدمقابل ہوں گے۔ یہ ایونٹ سینئر لیول پر ٹینس کی بڑھتی ہوئی مقبولیت کی عکاسی کرتا ہے اور تجربہ کار کھلاڑیوں کو اپنی مہارت دکھانے کے لیے ایک بہترین پلیٹ فارم مہیا کر رہا ہے۔
افتتاحی تقریب کی مہمانِ خصوصی راشد لطیف اسکول آف بزنس کی سی ای او اور راشد لطیف خان یونیورسٹی کی ڈائریکٹر مارکیٹنگ محترمہ زلیخا خان تھیں۔ تقریب میں ٹینس اور کھیلوں کی دنیا کی اہم شخصیات نے شرکت کی، جن میں حسن سعید (ڈائریکٹر فیکلٹی آف بزنس، راشد لطیف خان یونیورسٹی)، رشید ملک (سینئر ایگزیکٹو وائس پریذیڈنٹ، پنجاب لان ٹینس ایسوسی ایشن)، طارق مرتضیٰ، طفیل چیمہ، عارف قریشی (ٹورنامنٹ ریفری)، کرنل (ر) آصف ڈار، سہیل ملک، نسیم احمد اور فہیم صدیقی شامل تھے۔
تقریب میں کھلاڑیوں، کوچز، والدین اور میڈیا نمائندوں کی بڑی تعداد نے شرکت کی، جو اس چیمپئن شپ کی اہمیت اور عوامی مقبولیت کا واضح ثبوت ہے۔
میچوں کے نتائج:
سینئرز 35+ سنگلز فائنل: عمران بھٹی نے ذاکر اللہ کو 1-6، 0-6 سے ہرا کر ٹائٹل اپنے نام کیا۔
سینئرز 40+ سنگلز: سلیمان جنید نے رانا ہمایوں جاوید کو 1-6، 0-6 سے شکست دی۔
سینئرز 45+ سنگلز (سیمی فائنلز): ہادی حسین نے شہریار سلامت کو 2-6، 4-6 سے جبکہ ہیساشی ایزومی نے محمد اصغر کو 0-6، 3-6 سے ہرا کر فائنل میں جگہ بنائی۔
سینئرز 50+ سنگلز (سیمی فائنلز): قادر نواز نے حسن سعید کو 4-6، 2-6 اور عشر علی خان نے جواد نور کو 0-6، 0-6 سے شکست دی۔
سینئرز 55+ سنگلز (سیمی فائنلز): عرفان احمد نے عارف محمود کو 2-6، 1-6 سے جبکہ عارف فیروز نے خرم امتیاز کو 6-4، 0-6، 4-6 سے سخت مقابلے کے بعد شکست دی۔
سینئرز 60+ سنگلز: راشد ملک نے کامران قریشی کو یکطرفہ مقابلے میں 1-6، 0-6 سے ہرا دیا۔
سینئرز 65+ سنگلز فائنل: بریگیڈیئر غضنفر نے حسیب بیگ کو 0-6، 1-6 سے ہرا کر کامیابی حاصل کی۔
سینئرز 70+ سنگلز: مبین ملک نے طفیل چیمہ کو 3-6، 2-6 سے شکست دی۔
سینئرز 75+ سنگلز فائنل: محمد سعید نے امتیاز ملک کو 2-6، 0-6 سے ہرا کر فائنل جیت لیا۔
