*رشید ملک اور مائیکے کلائن کی آئی ٹی ایف ماسٹرز مکسڈ ڈبلز 45+ کے فائنل میں رسائی*
لاہور: پاکستان کے ٹاپ رینکڈ آئی ٹی ایف سینئر ٹینس کھلاڑی رشید احمد ملک نے جرمنی کی مائیکے کلائن کے ساتھ شراکت میں شاندار کارکردگی کا تسلسل برقرار رکھتے ہوئے رابنسن کھاؤ لک ٹینس آئی ٹی ایف ورلڈ ماسٹرز ٹور ایم ٹی 200 کے مکسڈ ڈبلز 45+ ایونٹ کے فائنل میں جگہ بنا لی۔
سیمی فائنل میں پاک–جرمن جوڑی نے ناروے کے پیر ایوار واہل اور جرمنی کی جولیا رائزنر کو یکطرفہ مقابلے کے بعد اسٹریٹ سیٹس میں 0-6، 2-6 سے شکست دی۔ ملک اور کلائن نے میچ کے آغاز سے اختتام تک مکمل کنٹرول برقرار رکھا اور عمدہ نیٹ پلے، شاندار سروسز اور بہترین کورٹ کوریج کے ذریعے حریفوں کو سنبھلنے کا کوئی موقع نہ دیا۔ تقریباً 20 سال کم عمر حریفوں کے خلاف یہ فتح رشید ملک کے وسیع تجربے اور اعلیٰ مسابقتی صلاحیت کا واضح ثبوت تھی۔
دی بینک آف پنجاب کے زیرِ اہتمام کھیلنے والے رشید ملک پہلی مرتبہ مکسڈ ڈبلز 45+ کیٹیگری میں حصہ لے رہے ہیں اور اب اپنے پہلے ہی ایونٹ میں ٹائٹل جیتنے کے قریب پہنچ چکے ہیں۔ جرمنی کی مائیکے کلائن کی مستقل اور جارحانہ کھیل نے اس کامیابی میں کلیدی کردار ادا کیا، جس کے باعث جوڑی پورے میچ میں صرف دو گیمز ہی ہاری۔ فائنل میں رشید ملک اور مائیکے کلائن کا مقابلہ سوئٹزرلینڈ کی پیا کرومیناخَر اور جرمنی کے ڈورین ڈی ہاؤسٹ سے ہوگا، جو آئی ٹی ایف ماسٹرز ٹور کے ایک بڑے ایونٹ میں ایک سنسنی خیز مقابلے کی نوید ہے۔
